Iqembu lomdlalo wenguqu ele Chicken Inn selifikise imiklomelo engamatshumi amane ngemva kwemidlalo elitshumi lathoba munwe munye ngemva kokunqoba elikwenze iqembu le Buffaloes nge 2 ka nya ngoLwesithathu emini enkundleni ye Sakubva.
Iqembu le Chicken Inn lihlohlelwe ngabadlali abathi u Mitchelle Katsvairo kanye lo Thabani Goredema njalo limpumela itshiye leliqembu selikhokhela ngemiklomelo emihlanu phezu kwengalane ngemva kokuba iqembu elihlezi kundawo yesibili ele Triangle litshaywe nge 2 ka nye liqembu le Dynamos enkundleni yeGibbo.
Abahlohlele iqembu le Dynamos ngabadlali abathi uRodreck Mutuma kanye lo Ralph Kawondera njalo iqembu le DeMbare selilingene ngemiklomelo leqembu le Triangle womabili lawa maqembu elemiklomelo engamatshumi amathathu lanhlanu.
Kweminye imidlalo ebikhona namhla iqembu le Chapungu libe ngutshiki lobhanqa leqembu le Harare City 1 ka 1 okuyimpumela etshiye iqembu le Harare City likundawo yesihlanu engalaneni lilemiklomelo engamatshumi amathathu kuthi ele Chapungu likundawo yethoba munwe munye lilemiklomelo engamatshumi amabili lanhlanu.
Ohlohlele iqembu le Chapungu ngu Tongai Magwendere kuthi ohlohlele iqembu le Harare City ngu Talent Chawapihwa.
Ngasemalahleni iqembu le Hwange libhuqe ele Whawha nge 3 ka nya njalo imiklomelo yalo ivele kubadlali abathu uPritchard Mpelele, u Munyaradzi Mungadze kanye lo Newman Sianchali.
Limpumela itshiye iqembu le Hwange lilemiklomelo engamatshumi amabili lambili lihlezi kundawo yetshumi engalaneni.
Umdlalo obuphakathi kweqembu le ZPC Kariba lele How Mine uphele lawa maqembu engutshiki lobhanqa 1 ka 1 ikanti obuphakathi kwamaqembu adonsa nzima athi ele Dongo Sawmills kanye lele Flame Lily wona uphele zingutshiki lobhanqa kungela qembu elenelise ukulitshayela emambuleni.
Imidlalo iqhubekela phambili kusasa ngoLwesine lapho iqembu le Caps United elizadibana lele Tsholotsho enkundleni ye National Sports kuthi koBulawayo iqembu le Highlanders lizangqikilana lele FC Platinum enkundleni ye Barbourfields.