amalinks wokungena

Breaking News

Iqembu leDynamos Liyangisa Njalo eleHighlanders


Dynamos vs Highalnders
Dynamos vs Highalnders

Abalandeli beqembu lomdlalo wenguqu eleHighlanders kabaselalo ithemba kumqeqetshi uKelvin Kaindu ngemva kokuba iBosso ibhaxabulwe kabuhlungu liqembu le Dynamos kufinal yenkezo ye TM Pick n Pay Challenge ngoMgqibelo odluleyo.

Bazonde bagane unwabu abalandeli beqembu le Highlanders ngemva kokunqotshwa kweqembu labo nge 4 ka 1 ngele Dynamos okungokwesine ukudliwa kwaleliqembu ngele Dynamos lonyaka ngemva kokutshaywa kabili kumidlao yeligi ndawonye lokunqotshwa elikwenziwe ekuqaleni komnyaka kunkezo ye Bob90.

Lesisimo sesidale ukuba inengi labalandeli lihlamukele umqeqetshi weqembu uKelvin Kaindu yena abathi usephelelwe ngumcabango.

Imibiko eminengi emakhasini atholakala ebulenjini lapho okuhlangana khona abalandeli beBosso ngethi uKaindu akahambe njalo baya besilela labo abamsekelayo.

Umsekeli weqembu le Highlanders uSibonakaliso Ndlovu yena wekele lokuya emsebenzini namhla ethi inhliziyo yakhe ibuhlungu ngokudliwa kwe Bosso.

Ekhuluma ngemva komdlalo wangoMgqibelo uKaindu uvumile ukuba iqembu leDynamos lilikhulele elakhe kodwa wavika ngokuthi abadlali bakhe badlala besesaba ukusolwa ngabalandeli nxa bedlala leDeMbare.

Iqembu le Highlanders lisasekhona kumncintiswano owokuphakamisa isicoco seligi, inkezo yeChibuku kanye lele Mbada Diamonds okutsho ukuba uKaindu usaselalo ithuba lokuba athobe inhliziyo zabalandeli beqembu zona ezopha igazi.

Kolunye udaba olumayelana lomdlalo wenguqu bekungela imidlalo yeligi kulimpelaviki emazweni amanengi ngoba bekulemidlalo eyokudinga amazwe azakuyaphatheka kumidlalo yezwekazi lase Africa ezaqhutshelwa eMorocco ngomnyaka ozayo kanye lemidlalo eyokudinga amazwe azakuyadlala kumidlalo yezwekazi lase Europe ezaqhutshelwa elizweni lase France.

Emidlalweni ye Africa Cup of Nations kubelempumela emangalise abalandeli bomdlalo wenguqu kusibaya sika Group A lapho iqembu le South Africa elilomqeqetshi omutsha uShakes Mashaba elinqobe khona iqembu leSudan nge 3 ka nya khonale eSudan kuthi intshantshu zezwekazi iqembu le Nigeria linqotshwe ngele Congo Brazzaville nge 3 ka 2 lidlala lisekhaya.

Kubelesimanga lase Europe lapho iqembu elimela ilizwe le Albania elinqobe khona iqembu le Portugal lona elilabadlali abalodumo emhlabeni jikelele nge 1 – 0.

Iqembu eliphakamise isicoco se World Cup ele Germany lithwale nzima ukuba linqobe ele Scotland kodwa lenelisa ukuphumelela nge 2 ka 1 ekupheleni komdlalo.

Imidlalo iqhubekela phambili namhla ntambama kuzwekazi leEurope kulemidlalo eyithobamumwe munye egoqela ozakuba phakathi kwe Spain le Macedonia kanye lophakathi kwe Switzerland le England.

Uhlelo lokuphawulwa kwegama lika mascot wemidlalo ye Region 5 African Union Sports Council Youth Games ezaqhutshulwa edolobheni lako Bulawayo ekucineni kwalonyaka obekumele lwenziwe ngoMgqibelo odluleyo alusabanga khona njalo soluzayenziwa ngempelaviki ezayo.

Ingcazelo ephiwe ngabaqoqi baloluhlelo ngeyokuthi imascot leyo ibingakafiki ivela eSouth Africa njalo bakhangelele ukuba ifike namhlanje ngoMvulo.

Idolobho lako Bulawayo likhangelelwe ukwemukela amazwe afika amatshumi lanhlanu azaphatheka kulimidlalo engenwa ngabatsha abaleminyaka engaphansi kwamatshumi amabili.

Intathelizindaba yethu yezemidlalo uJoseph Njanji usipha loludaba ndawonye lezinye.

Udaba Silethulelwa nguJoseph Njanji
please wait

No media source currently available

0:00 0:01:13 0:00
Lapho esitholakala khona

XS
SM
MD
LG