Umqeqetshi weqembu le Highlanders uAmini Soma Phiri uthi ukungaziphathi kuhle kwabadlali baleliqembu yiyo imbangela yokungadlali kuhle kwalo.
USoma – Phiri utshele intathelizindaba zemidlalo emhlanganweni owenziwa maviki wonke phakathi kwenkokheli yeqembu le Highlanders lentatheli ukuba abadlali baleliqembu kumele baguqule ukwenza kwabo ukuze beqale ukunqoba.
Lumqeqetshi uthi okusilelayo kubadlali beqembu le Highlanders ngumoya wokungafuni ukudliwa ikanti lomthetho kabawubambi.
Kulemibiko ethi ngoLwesithathu uSoma – Phiri uxabane lomgadli uObadiah Tarumbwa ngesikhathi iqembu le Highlanders lizilolonga kwatshingelwana kwaba ncane indawo.
Ebuzwa ngalokho lumqeqetshi akathandanga ukuhluba indlubu ekhasini kodwa wathi babhekane lohlupho lokungaziphathi kwabadlali okuyinto abayithole ikhona labo ngesikhathi bethatha lumsebenzi ngenyanga edluleyo.
Iqembu le Highlanders lihlezi kundawo yetshumi engalaneni yemiklomelo kusigaba se PSL lilemiklomelo engamatshumi amabili lanhlanu njalo kumele linqobe kuyo yonke imidlalo eyisithupha elisele layo ukuze lingazitholi selidlala kusigaba sika Division One ngomnyaka ozayo.
USoma – Phiri uthethe umsebenzi wokuba ngumqeqetshi weqembu le Highlanders kusasele imidlalo eyithoba munwe munye ukuba imidlalo ifike komlindi uyacina njalo usedlale imidlalo emithathu wanqoba kowodwa lapho iBosso etshaye khona iqembu le Flame Lily wadliwa kwemibili lapho iBosso etshaywe khona yi Harare City kanye le Caps United.
Iqembu leBosso lizadlala leqembu le Dongo Sawmills emdlalweni walo olandelayo kuthi emidlalweni elandelayo lizadlala leqembu le Chapungu eGweru, lemukele iqembu le Buffaloes emagumeni, lizakuya emalahleni ukuyadlala leqembu le Hwange kuthi imidlalo yalo eyokucina emibili izakuba semagumeni lapho elizadlala khona leqembu le Tsholotsho kanye leqembu le ZPC Kariba.
