Umqeqetshi weqembu lenguqu labasakhulayo ele Highlanders elidlala ku Southern Region Soccer League uMelusi Sibanda uthi iqembu leli lizalwisa ukuba liphutshe imidlalo yalo lihlezi kuzinga laphezulu engalaneni yemiklomelo.
Umqeqetshi weqembu le Bosso elibunjwa ngabadlali abaleminyaka yabo eyokuzalwa engasabavumeli ukudlala kuligi yama Juniors kodwa bengakalungeli ukudlala kuqembu elidlala esigabeni se Premier Soccer League uMelusi Sibanda uthi iqembu leli lizancintisa kanzima esigabeni sika Division One lonyaka.
Leliqembu lifinyelele ukuyadlala kulesisigaba ngemva kokuba liphutshe imidlalo yalo likuzinga lesibili engalaneni yemiklomelo kusigaba se Bulawayo Province Division 2 ngomnyaka ophelileyo.
Umqeqetshi walo uMelusi Sibanda uthi abafana bakhe bazaqhuba kuhle ku Division One ngoba sebeleminyaka embalwa bedlala bendawonye njalo inengi labo ngabafana abasakhulayo.
USibanda uthi abanye abadlali baleliqembu elibunjwa ngamajaha inengi lawo aleminyaka engedluli amatshumi amabili bazakhuphuka bayedlala kuqembu elidlala kusigaba se Premier Soccer League njalo indawo zabo zizathathwa ngabadlali abavela kuqembu labasakhulayo elabaleminyaka engaphansi kwetshumi latshiyagalombili kanye labanye abavela kwamanye amaqembu.
Iqembu leli elaziwa ngokuthi yi Highlanders Under – 19 loba Highlanders Academy lifinyelele ukuyadlala kusigaba sika Division One ngemva kokuba liqede imidlalo yalo kusigaba se Bulawayo Province Division 2 likundawo yesibili ngemva kweqembu le Talen Vision nyakenye.
Abafana be Talen Vision baqede belemiklomelo engamatshumi amahlanu lathoba munwe munye ikanti abafana be Bosso baqede belemiklomelo engamatshumi amahlanu lanhlanu.
Abanye abadlali beqembu le Highlanders Academy abaqhube kuhle nyakenye njalo okukhangelelwe ukuba lonyaka umnyaka ungaphela sebedlala kuqembu elidlala kuPSL ngabagoqela umgadli uPrince Dube yena otshayele emambuleni amagoli angamatshumi amabili nyakenye kanye lomdlali wenkabeni yenkundla uBrian Banda.