Kuleqembu le Mixed Martial Arts eselibunjwe edolobheni lako Bulawayo ngumqeqetshi womdlalo we Taekwondo uRicky Tembo.
Umdlalo we Mixed Martial Arts usumemetheke njengomlilo weganga wasabalala umhlaba wonke jikelele njalo usuze wafika lase Zimbabwe edolobheni lako Bulawayo lapho umqeqetshi womdlalo we Taekwondo uRicky Tembo asebumbe khona iqembu alibiza ngegama elithiwa Black House Fight Club.
Lumdlalo uthakazelelwa ngabanengi emazweni aphetsheya kanye lakomakhelwane kwele South Africa lapho ingqungquthela eyomdlalo wenqindi eyisizalwane sase Zimbabwe uElvis Moyo yena owaziwa ngegama lomsebenzi elithi Bulawayo Bomber laye ongomunye wabadlali bawo.
Lumdlalo uhlanganisa imidlalo etshiyeneyo eyokuzwana amandla egoqela i Judo, iBoxing, iJu Jitsu, iTaekwondo kanye le Wushu.
UTembo uthi umehluko we Mixed Martial Arts leminye imidlalo eyokulwa yikuba yona ilakho ukunceda abadlali ukuba babekwazi ukuzivikela emphakathini abahlala kuwo ngoba ihlanganisela lokutshaya kwangempela hatshi okomncintiswano kuphela.
Okwamanje iqembu le Black House Fight Club lisadinga indawo lapho elizazilolongela khona njalo uTembo uthi ulethemba lokuba ingatholakala lumdlalo uzagxila impande koNtuthu kuthi ngemva kwalokho usabalale lakwamanye amadolobho.
UTembo ngumqeqetshi weqembu le Taekwondo elimela ilizwe le Zimbabwe kodwa aphinde abe ngumdlali wenqindi kanye le Ju Jitsu.
Loba kunjalo uthi yena uphakela abadlali be Mixed Martial Arts abakuqembu le Black House Fight Club imfundiso eyomdlalo we Taekwondo kuthi eminye imidlalo bayifundiswe zingcitshi zeminye imidlalo.