Isigaba seManicaland yiso esithole imendulo ezinengi kumidlalo yezikolo ze primary ebiqhutshelwa edolobheni lako Bulawayo ngoLwesibili langoLwesithathu.
Isigaba se Manicaland yiso esiphutshe imidlalo siphezu kwengalane yemendulo ngemva kokuba sithole imendulo zegolide ezine, kanye lemendulo zesiliva ezintathu.
Kundawo yesibili kuleqembu elimela isigaba se Harare lona elithole imendulo zegolide ezine ndawonye lemendulo yesiliva eyodwa.
Iqembu elimela isigaba esiqoqe limidlalo elako Bulawayo liqede likundawo yesithathu lilemendulo yegolide eyodwa kanye lemendulo zesiliva ezintathu.
Kundawo yesine kuleqembu elimela isigaba se Mashonaland Central elithole imendulo yegolide eyodwa kanye leyodwa eyombala wethusi.
Iqembu le Mashonaland West lona liqede likundawo yesihlanu lilemendulo eyodwa eyohlobo lesiliva kanye lezintathu ezombala wethusi.
Kundawo yesithupha kutholakala amaqembu amabili athi ele Mashonaland East kanye lele Masvingo wona athole imendulo yesiliva eyodwa kanye lezimbili ezombala wethusi.
Iqembu le Midlands lihlezi kundawo yethoba minwe mbili lilemendulo ezimbili ezohlobo lwethusi ikanti amaqembu amela izigaba ezithi iMatabeleland South le Matabeleland North aqede imidlalo engela ngitsho leyodwa imendulo.
Izigaba lezi bezincintisana kumidlalo egoqela inguqu, i volleyball, irugby, i tennis, inetball kanye le basketball.