Kuphume imibono etshiyeneyo phezu kokubulawa kwesilwane ebesithakazalelwa yizethekeli eziza eZimbabwe saze sanikwa igama lokuthi nguCecil, abanye besithi abalani lokufa kwaso njengoba bebevele bengasazi ngakho kungatsho lutho kibo.
Ukubulawa kwesilwane uCecil ngenyanga edluleyo, sibulawa ngomunye wabazingela okulenzuzo uWalter Palmer odabuka kweleMelika, sokudale inkulumo umhlaba wonke jikelele ikakhulu abaphatheke kwezokulondolozwa kwenyamazana zendle kanye lezethekeli.
Kodwa inengi labantu eZimbabwe baveze ukungazi okunengi ngales silwane njalo bethi ukuphila lokufa kwaso akubasizi ngalutho njengoba laleyo mali etholakala ngokuzingelwa kwazo bengazi ukuba isiwa kusiphi isikhwama sikahulumende.
Umnumzana Henry Mateu uyintathelizindaba esebenza izimele, esebenzela eHarare utshengise ukukhathazeka phezu kokuqakathekiswa kwalesi silwane ethi abantu makhaza njengaye bebevele bengazi ngaso.
Wathi lo msindo osusenziwa ngabakwamanye amazwe ungatsho lutho kuye labanye abanjengaye ngoba vele kungatsho lutho kibo njengoba singekho isizatho sakhona.
Ngeviki ephelileyo umphathintambo wezokulondolozwa kwemvelo, unkosikazi Oppa Muchinguri Kashiri utshele umhlangano lentathelizindaba ukuba uhulumende ufuna alethwe eZimbabwe uPalmer, azomiswa phambi komthethwandaba.
Kodwa umtshutshisi omkhulu elizweni umnumzana Johannes Thomana, uveze ukuba lokho kuyinto okumele yenziwe ngabehofisi ebona ngezenzakala phakathi kwelizwe.
Ngasikhathi sinye abe Home Affairs bona bathi lolu ludaba okumele lutshutshiswe ngabogatsha olubona ngezemithetho elizweni, kuthi isikhulumeli samapholisa uSeniour Assistant Commissioner Charity Charamba uthi kungela angakutsho phezu kwaloludaba njengoba selusezandleni zomthethwandaba.
Kunje ababili abaphathise kulesi senzo sokubulawa kukaCecil, ababalisa umnumzana Theo Bronchorst lomunumzana Honest Ndlovu sebethathelwe ama licence abo okuqhuba umsebenzi.
UBronchorst umiswe phambi komthethwandaba eHwange waphiwa ithuba lokuhlawula isigidi samadollar-$1,000 000 yesibambiso.
Lesi silwane ebesesileminyaka elitshumi lantathu yokuzalwa sibulawelwe epulazini le Antoinette farm endaweni ye Gwayi Conservancy emangweni we Hwange.