Izakhamizi zeHarare zithukuthele zicatshulwa yisinqumo somthethwandaba we High Court, esesivumele umanisipala weHarare ukuba avalele uzulu amanzi olezikwelede ezisukela kukhulu lamadollar kusiyaphezulu. Izakhamizi zithi ukwehluleka kwazo ukuhlawula limithelo kubangelwa yisimo somnotho, ethi lilungelo lakhe ukuba atholiswe amanzi ahlanzekileyo phansi kwesisekelo sombuso.
Lokhu kukhalaza kwezakhamizi kuza ngemva kokuba umahluli we High Court uHappias Zhou, elahle udaba lwazo ezilukhweze kulelidale ngesiphangiphangi, zidinga ukuba limise ukuvalwa kwamanzi ngoba zilezikwelede.
Izakhamizi zithi lesi sinqumo sizokupha umanisipala igunya lokwenza santando ukuwavala lawo manzi, okuzakwenza omanisipala ilizwe lonke benze okufanayo.
Umnumzana Clive Chikafu wase Mabvuku uthi lesi sinqumo asimjabulisi ngitsho lakancane.
Umnumzana Sindiso Mwale wasemzini weSouthlea Park yena uthi kungumlandu kahulumende ukuba atholise izizalwane zakhe amanzi ahlanzekileyo sikhathi sonke, hatshi lokhe osekusenziwa.
Lesi sinqumo siza ngemva kokuba umphathintambo wezokuthuthukiswa kwezabelo lamadolobho, umnumzana Saviour Kasukuwere etshengise ukusekela umbono wabomanisipala wokuvalela abantu bonke amanzi abalezikwelede.
Izakhamizi zithi zesabela ukuba sizobangela udubo lesi sinqumo, esifana laleso esicine sibangela ukuxotshwa kwezisebenzi ngobunengi esethulwe lidale le Supreme Court ngoNtulikazi.
Umanisipala yena uthi udaniswa yindlela uzulu aziphethe ngayo, engazihluphi ukuhlawula imithelo yamanzi lalapho zike zesulwa phambilini kokhetho luka2013.