Owayengumgcinisihlalo webandla le Zanu PF esigabeni se Mashonaland West, uMnu. Themba Mliswa umiswe phambi komthethwandaba weChinhoyi ngoMvulo esetheswa icala lokweba imibhobho yohlobo lwe AK 47 eyisithupha lamavolovolo amabili.
UMliswa ngomunye weziphathamandla zebandla leZanu PF ezetheswa icala lokuba kucele lowayengumsekeli kamongameli uNkosikazi Joice Mujuru. Igqwetha lakhe, uMnu. Musindo Dunira Hungwe utshele iStudio Seven ukuthi uMliswa wetheswa icala lokweba limbhobho kwelinye ipulazi lomlimi omhlophe esigabeni sakhe ngomnyaka ka 2002.
Kodwa uHungwe uthi okumangalisayo yikuthi amapholisa asebopha uMliswa namhla ngemva kweminyaka edlula elitshumi lambili. Umantshi, uMnu. Ignatius Mugova uthe kuzamela uMliswa aphindele njalo emthethwandaba kusasa lapho udaba lokuthi aphiwe na ithuba lokuhlawula imali yesibambiso sebail oluzahlaziywa khona.
UChris Gande weStudio Seven uxoxe lowalwa impi yenkululeko ekuvuyo lwe Zipra, uMnu. Max Mkandla ukuze sizwe imbono yakhe ngaloludaba.
Siphinde saxoxa lengcwethi ecubungula ezombusazwe, uMnu. Rejoice Ngwenya othi sekuyinhlalayenza yeZanu PF ukuthi yethese icala lokutholakala lembhobho labo abayabe belembono ehlukene lalelobandla.