amalinks wokungena

Breaking News

Ungena Kusuku Lwesibili Umbukiso weBook Fair eHarare


Uhulumende ukhuthaza abalobi ukuloba ingwalo zama novel ngendimi zesintu ezitshiyeneyo ezitholakala eZimbabwe ukuze ezinye zazo zisetshenjiswe ezikolo njengama set books phansi kweziqondiso zokuqoqa izifundo elizweni i- curriculum entsha elungiswayo.

Umphathintambo wezemfundo yePrimary le Secondary uDokotela Lazarus Dokora wenze linkhuthazo evula umbukiso we Zimbabwe International Book Fair osungule lamhlanje eHarare. UDokora uthi ugwalo lwe curriculum entsha soluphambi kwe committee yedale labampathintambo eleCabinet eliphakathi kokuhlolisisa ngomumo wayo.

Umlobi Umnumzana Naison Twala uthi lokhu kuyaphathisa njalo kuvulela abalobi amathuba:

Abalobi babhekana lenkinga zokutshontshelwa ingwalo zabo ngabazithengisa ngokungaphandle komthetho I piracy bona bengatholi lutho. Ingcitshi kwezokudindwa kwamabhuku kwele Tanzania umnumazana Walter Bgoya uthi lokhu kuyafana lokusetshenjiswa kobulembu lweInternet ukubala amabhuku kuphazamisa imisebenzi yababhali kunye lezifundi esezithembela ku internet.

Unkosikazi Oglady Ncube oyingcwethi okwezokulondolozwa kweziphala zamabhuku u-Librarian ko Bulawayo uthi sokulokwehla kokubalwa kwamabhuku lasendaweni ezinje:

UTwala uthi ukutshontshelwa ngendlela yePiracy lokhe kuqubekela phambili lobanje sokulomthetho ovikela ukuba lokhu kungenzakali ethi okukhona yikusilela kolwazi ebantwini.

U Ncube uthi inkinga zonke lezi zibangela ukuba bebone ukusilela kwengalo lama bhuku eZimbabwe okugoqela lakuma library:

Uthi imbiko ka Dokora iyamukeleka kodwa kudingakala ukuba uhulumende abe lesikhwama sokuphathisa abalobi ukuba bangene ngokuzwayo emisebenzini yokubhala ingwalo ngendimi ezitshiyeneyo.

IBook Fair yenziwa kanye ngomnyaka ibuthanisa abalobi, abadinda amabhuku, abama library labathengi njalo umbukiso walonyaka ukhuthaza ukuthuthukiswa kolwazi ngokucubungula , ukubhala, ukudhinda lokubala.

XS
SM
MD
LG