amalinks wokungena

Breaking News

ITriangle Yiyo Ehlezi Phezu Kwengalane Yemiklomelo yePSL


Ingalane yemiklomelo eyeCastle Lager PSL
Ingalane yemiklomelo eyeCastle Lager PSL

Impumela eyemidlalo eyeviki yakuqala kusigaba se PSL iveza ukuba iqembu le Triangle yilo elihlezi phezu kwengalane yemiklomelo lilemiklomelo emithathu ndawonye lamaqembu athi ele Dynamos, ele ZPC Kariba, ele Caps United ele Chicken Inn kanye lele Tsholotsho.

Iqembu le Triangle litshaye ele Hwange nge 5 ka 2 kuthi ele Dynamos litshaye ele Buffaloes nge 3 ka nya kuthi ele ZPC Kariba linqobe ele Highlanders nge 2 ka nya kwathi ele Caps United litshaye ele Hwahwa nge 2 ka 1, kuthi iChicken Inn layo inqobe i Flame Lily nge 2-1 ikanti iqembu le Tsholotsho litshaye ele Harare City nge 1 ka nya.

Amaqembu alomklomelo owodwa ngemva kokuba ngutshiki lobhanqa ngathi ele Dongo Sawmills lele FC Platinum wona abe ngutshiki lobhanqa 1 ka 1 kanye le How Mine le Chapungu ezitshayane zaze zabhekana kungela qembu elenelise ukulitshayela emambuleni.

Emidlalweni edlalwe ngamaqembu amela ilizwe le Zimbabwe iqembu labamajaha aleminyaka engaphansi kwamatshumi amabili lantathu linqobe elabosowabo abe Cameroon nge 1 ka nya esigodlweni iHarare emdlalweni wokudinga amaqembu azakuyaphatheka kumidlalo yezwekazi le Africa kuthi iqembu labesifazane lona linqotshwe nge 2 ka 1 ngele Ghana khonale eGhana emdlalweni wokudinga amazwe azadlala kumidlalo yezwekazi lase Africa njalo. Lawa maqembu azaphindana umphehlo ngemva kwamaviki amabili.

*************************

Sikhangele imidlalo yenguqu edlalwe kwamanye amazwe;

Iqembu le Barcelona selikhokhela ngemiklomelo emine phezu kwengalane yemiklomelo elizweni le Spain ngemva kokunqoba elikwenze ele Real Madrid nge 2 ka 1 ngeSonto.

Limpumela itshiye iqembu le Barcelona lilemiklomelo engamatshumi ayisithupha lathoba minwe mbili (68) kuthi ele Real Madrid lilemiklomelo engamatshumi ayisithupha lane.

Elizweni lase Ngilandi iqembu leChelsea lilokhu likhokhela ngemiklomelo eyisikhombisa phezu kwengalane ngemva kokunqoba kwalo ele Hull City nge 3 ka 2 kwathi lelo elihlezi kundawo yesibili ele Manchester City lanqoba ele West Brom nge 3 ka nya.

Ele Arsenal lalo lalele kundawo yesine ngemva kokutshaya ele Newcastle nge 2 ka 1 kwaba ngesifanayo lakuqembu elikundawo yesine ele Manchester United lalo eliyalele lapho ngemva kokunqoba ele Liverpool nge 2 ka 1.

Bekungela midlalo yeligi elizweni le South Africa lapho obekudlalwa khona imidlalo yenkezo ye Nedbank njalo amaqembu asefinyelele kusigaba se quarter-final ngathi ele Golden Arrows, ele Mamelodi Sundowns, ele Supersport, ele Black Leopards, ele Mpumalanga Black Aces, ele Vasco Da Gama, ele Ajax Capetown kanye lele Bidvest Wits.

*****************************

Sikhangele umdlalo kakhilikithi ;

Imidlalo yezizwe zomhlaba isifike kusigaba se semi-final njalo kusasa iqembu le New Zealand lizadibana lele South Africa enkundleni ye Eden Park esedolobheni lase Auckland kuthi mhla zingamatshumi amabili lesithupha iqembu le Australia lizadlala lele India enkundleni ye Sydney Cricket Ground.

Amaqembu azanqoba kuyo limidlalo azadibana kumdlalo we final ozadlalwa mhla zingamatshumi amabili lathoba munwe munye enkundleni ye Melbourne Cricket Ground kuthi elizanqoba lapho yilo elizaphakamisa isicoco sokuba zintshantshu emhlabeni jikelele emdlalweni kakhilikithi.

XS
SM
MD
LG