amalinks wokungena

Breaking News

UPhathisa Nyathi Uthi Izulu Lokucelwa Laliniswa Yiwosana Lamagogo


Iwosana zazigida kuze kudume phansi nxa kudingwa izulu. (Photo: Butholezwe Kgosi Nyathi)
Iwosana zazigida kuze kudume phansi nxa kudingwa izulu. (Photo: Butholezwe Kgosi Nyathi)

Kuhlelo lwamasiko lenhlalakahle yabantu, ngoLwesibili siqhubekele phambili ngengxoxo yosiko lwesintu lokucela izulu eZimbabwe.

Ngeviki edluleyo uMnu. Phathisa Nyathi ingcwethi kwezamasiko esintu ubecasisa ukuthi kwenziwani emaphandleni endaweni ezitshiyeneyo nxa kucelwa izulu.

Uthe ukucela izulu kubizwa ngokuthi yikucela amazolo. Nxa kusenziwa lokhu, abantu abalemizi babambisana indlela baye egangeni lapho abazingela khona inyamazana ezithize kubesokutshiswa amathambo azo lakho konke okucabengelwa ukuthi kuvala izulu.

Kwenzakalani-ke eNjelele nxa kucelwa izulu?

UNyathi uthi abantu abavela endaweni ezitshiyeneyo babehamba ngenyawo besiya eNjelele izolo kodwa lamuhla sebehamba ngezimota lezinqola bethwele utshwala lokunye okusetshenziswa khonapho.

UNyathi uthi, “Ziyabulawayo lenkomo khonangale kuthi-ke okunye amalembu amnyama belawo asezangeniswa khonangale kulapho okugida khona iwosana eziyizo ezithi zingagida izulu line.”

Uthi kwakujayele ukuthi izulu line nxa labo abakade baye eNjelele sebesuka khona kuthiwe-ke licitsha inyawo zabo.

“Nxa kungani kubonakala ukuthi lingani liyasilela kulandela ukugida kwamawosana bekukhona futhi ngapha esiKalangeni umgido okuthiwa ngamayile. Lapho osokuphuma khona omama kakhulu lapho-ke hatshi kabasavunulanga lokuvunula njalo kabasafuni lokubona obaba. Bayebe bezitshaya ingungu kugidwa sibili. Ukuthi amayile ngesiKalanga kutsho ukuthi okuzilayo.

Uthi nxa kungehlula konke lokhu kuyaphunywa njalo kuyezingelwa igogo ezintabeni elibanjwa lilaliswe endlini liyekelwe lizihambele egangeni.

Lokhu kwakusenziwa nxa sokunzima sibili.

Uthi abantu abanengi kabasakukholwa konke lokhu njengoba sebekhonza okwenziwa ngabamhlophe.

Uphinde wathi kunzima ukuthi kuvuselelwe konke lokhu njengoba amasonto emzini eseyisa amasiko esintu.

Ingxoxo Esiyenze LoMnu. Phathisa Nyathi
please wait

No media source currently available

0:00 0:03:43 0:00
Lapho esitholakala khona

XS
SM
MD
LG