amalinks wokungena

Breaking News

Iyaswelakala Indawo kaForm One


Zimbabwe
Zimbabwe

Uhulumende ukhuthaza abazali abalabantwana abadinga indawo zika Form One ukuba bayedinga usizo ehofisini kaDistrict Education Officer, ozaphathisa ngokubabonisa ukuba kuyisima kanjani ezikolweni kusukela kweze boarding loba ezingayisizo. Linkuthazo iza ngemva kokuba sekuvele ukuba inengi labaphutshe izifundo zika Grade Seven bayehluleka ukuthola indawo sikaform one lanxa abanye babo bepase okubukekayo okwamagama.

Emhlanganweni lentathelizindaba owenzelwe emahofisini akhe, umphathintambo wezemfundo yePrimary le Seconday uDr Lazarus Dokora uthi uhulumende uzimisele ukubona ukuba wonke umntwana uyanelisa ukuya phambili ngemfundo yakhe ngemva kokuba ephutshe izifundo zakhe zika Grade Seven.

Uthi uDokora uthi uhulumende, ngaphansi kohlelo lwe Education Management Information Systems- Emis, uphathisana labazali ukuthi banelise ukuthola indawo zika form one ukuze bangaze bamotsha izimali ezinengi bebhoda bedinga lezondawo.

Kodwa uzulu okhulumisane le Studio Seven, okubalisa umnumzana Jeffery Moyo, utshengise ukukhathazeka ngokutshiwo nguDokora ethi akusebenzi njengoba kusazakala ukuba indawo zesikolo zidingwa kubaphathi bazo. Uthi uMoyo lokhu kuzakuphazamisa imfundo yabantwana ngoba kuzakwengezelela ukungathembeki kuziphathamandla ezitholisa indawo ezikolweni.

Uhulumende uthi eleZimbabwe lizakuqhubekela phambili lisiba lodubo lokusilela kwezikolo, ngoba kunje kudinga ukuba kwakhiwe izikolo ezedlula inkulungwane ezimbili zemfundo ye Primary le Secondary – 2056.

Lokhu kusitsho ukuba luzaqhubekha udubo lokufunda kwezifundi zintshintshana ezikolo, ezinye zingena ekuseni kuthi ezinye zingene emini abayithi yiHot sitting, kuze kuyekuthi sezingezelelwe izikolo.

Uveza njalo uhulumende ukuthi kunje izikolo phose inkulungwane elengxenye – 1425 kuyileziya ezaziwa ngokuthi ngama satilite schools kusitsho ukuba ngezitholakala endaweni lapho uzulu wahlaliswa kutsha khona njalo kumele zithuthukiswe zifike esibangeni esabekwa nguhulumende.

Izikolo ezedlula inkulungwane eziyisitshiyagalombili – 8 200 zezikolo ze primary le secondary elizweni, zibikwa ziphansi kwamakhansili ezabelo – ama Rural district council.

Kusitsho ukuba lesi isilinganiso sokungamatshumi ayisitshiyagalombili ekhulwini – 80%, zezikolo ze Primary le Secondary elizweni ziphansi kwamakhansili la ezabelo.

XS
SM
MD
LG