Inhlanganiso yabatsha njalo ilwela amalungelo oluntu isikhuthaze ukuthi abezombusazwe bayekele ukusebenzisa abasakhulayo abaswele imisebenzi ukuncindezela uzulu kumbe ukuthenga amavoti ngalesisikhathi kukhankaselwa ukhetho lwama by elections endaweni ezithile zelizwe.
Inhlanganiso yabatsha eye Youth Initiative iphathe umhlangano ukuxoxisana ngokuphatheka kwabatsha kwezombusazwe lendima abayidlalayo ekukhankaseleni ukhetho lwama by-elections koBulawayo laseTsholotsho.
Lumhlangano uza ngesikhathi imbiko ephumayo isithi ibandla leZanu PF liphatheke ekukhankaseni emizini ehlala abanengi lapho ehamba ngandlu ngandlu idinga ukuvotelwa.
Enye imbiko ithi inhlelo zokulungiswa kwemigwaqo ezisungulwe ngumsekeli kamongameli uMnumzana Phelekezela Mphoko emzini we Cowdray Park ngezokudinga ukuthi uzulu wakulindawo avotele ibandla lakhe kukhetho lweLuveve Constituency.
Ekhuluma labatsha emhlanganweni lo, uNkosikazi Emelda Mpofu, olwela amalungelo oluntu kulinhlanganiso, uthi kuqakathekile ukuthi abatsha baphatheke ekubusweni kwelizwe ngoba inhlupho ezinjengokuswelakala kwemisebenzi kanye lokuqonga kwembadalo yemfundo kuphatha bona kakhulu kodwa lokhu akutsho ukuthi basetshenziswe ekuncindezeleni lokuhlukuluza uzulu. Uthi ukuhlupheka kwabatsha yikho okwenza kube lula ukuthi inkokheli zibasebenzise ekudaleni udlakela kanye lokuhlukuluza uzulu nxa kusiba lokhetho.
Osakhulayo, uMnumzana Gideon Makombe ongene lumhlangano, uthi abatsha bazimisele ukuphatheka ngokugcweleyo ukuthi ilizwe libe lokuthula njalo libuswe ngendlela ethandwa nguzulu. Uthi lokhu abatsha bazakwenza ngokuxwayana lodlakela, kodwa bayevota ngobunengi lapho okulokhetho khona abantu bazikhethele inkokheli abayifunayo kungela obathwalele izikhali.
Inani eliphezulu lezizalwane zakuleli ngabasakhulayo lanxa nje belokhu bengatholatholakali kunkokheli yelizwe kumbe lapho okuthathwa izinqumo ezimqoka ngokubuswa kwelizwe, uMnumzana Makombe athi kuveza obala ukuthi abakhokheli bafuna nje ukubasebenzisa kodwa bengabaphi izikhundla kumbe amathuba okumela uzulu.
Inhlanganiso yeHeal Zimbabwe Trust ithi ibandla elibusayo lisebenzisa abatsha emadolobheni kuthi emaphandleni lisebenzise inkokheli zomdabu kanye labalwa impi yenkululeko ukuncindezela uzulu kukhetho. Ithi uzulu weTsholotsho usethuselwe zinduna ukuthi akuzukulunga esigabeni lesi nxa uzulu angekela ukuvotela ibandla leZanu PF kukhetho lwenyanga ezayo.
Umnumzana Mekiya Ncube, oka Ward 6 eTsholotsho uthi abakufuni ukwethuselwa ngoba ukhetho ngolokuthi umuntu akhethe lowo amthandayo ngenhliziyo ekhululekileyo hatshi ukuthi abalwa impi yenkululeko lezinduna babe ngontando kayiphikiswa abazenzela abakuthandayo phezu kukazulu.
Ukhetho lwama by elections luzaphathwa elizweni mhlaka 10 ngenyanga ezayo kulandela ukuxotshwa kwamalunga edale lephalamende libandla le MDC-T kanye lalabo abaxotshwa libandla le Zanu PF.
Emhlubulweni wemaNdebeleni ukhetho luyaphathwa endaweni ezinhlanu koBulawayo, ezibalisa iLuveve, Pumula, Pelandaba- Mpopoma, Lobengula leMakokoba kuthi eMatabeleland North eTsholotsho North. Amacele awe MDC alile ukuphatheka kulolukhetho.