Umthethwandaba wakwele Botswana unqume usekela isikhalazo sezizalwane ezimbili zeZimbabwe sokuthi idale libambe ngamandla uhulumende walelo lizwe ukupha abavela kwamanye amazwe abasentolongweni amaphilisi aphiwa abaphila legciwane lengculaza awama ARVs.
Umahluli Judge Ian Kirby owomthethwandaba wezikhalazo oweCourt of Appeal wethule isinqumo lesi esigcizelela esethulwe ngumthethwandaba waphezulu oweHigh Court ukuthi abakwamanye amazwe abasemajele baphiwe ama ARVs.
Uhulumende weBotswana ubephikise isinqumo seHigh Court sanyakenye sokuthi anikeze abasemajele laba esithi ayisiwo mlandu wakhe njalo kuzamdalela indleko enkulu.
Uhulumende weBotswana usethe ngokunqotshwa kuleli dale uzasilandela isinqumo seCourt of Appeal.
Igqwetha ebelimele abeZimbabwe laba, uTshiamo Rantao lithi lithokoziswe yisinqumo lesi njalo yikunqoba kwabavela kwamanye amazwe abaphila lengciwane lengculaza besentolongweni.
Umnunzana Rantao uthi ukhangelele ukuthi uhulumende alandele lesisinqumo njengoba esaziwa ngokuhlonipha umthetho.
Isizlwane seZimbabwe ebekade silandela loludaba, umnunzana James Moyo uthi uyathokoza ngesinqumo seCourt of Appeal.
UMoyo uthi ngokungabinikezi ama ARVs, uhulumende weBotswana ube eba gwebela ukufa.
Kodwa omunye wakhe oweBotswana udaniswa yilesi sinqumo esithi silakho ukwengeza ukudalwa kwamacala yilabo abavela kwamanye amazwe belomkhuhlane wengculaza bethembe ukuya ejele.
Udaba lolu luqale eHigh Court ngomnyaka ka2013 ngemva kokuba ababali abeZimbabwe abasejele eGaborone bedinge uncedo lwama ARVs.
Phose abangamakhulu ayisikhombisa abeZimbabwe abasemajele eBotswana kukanti inani lonke ligoqela abamanye amazwe liphosa libe yinkulungwane.