Izidumbu zabantu abalitshumi lanye ababhubhe engozini yomgwaqo eBotswana kumaviki amabili edluleyo zikhangelelwe ukufika elizweni ngoLwesithathu.
Iziphathamandla zikahulumende kanye lababhujelweyo bahlangabeza lezi izidumbu ePlumtree Border Post.
Inengi lababhubhileyo livela e Malila Line ngaphansi kuka Chief Gampu Sithole, ongomunye wabancedisa kuloludaba. Omunye obhubhileyo uvela ku eMalanda village eTsholotsho, njalo abanye ngabantwana abayizelamani abavela e Matjinge, eBilingoma, eBulilima. Unina wabantwana ubikwa wasila kulingozi ndawonye labanye abayisithupha imota yabo ize iphume emgwaqweni itshayane lesihlahla ngemva kokutshaya ubabhemi.
Isiphathamandla sikahulumende eTsholotsho uNkosikazi Nosizi Dube ubikwa esithi abanye babengelancwadi zokuhambisa, okubangele ukuthi izidumbu lezi zingalethwa ekhaya masinyane.
Uhulumende ubikwa ephathisa imuli zababhujelweyo ngendleko zomgcwabo kanye lezililo njalo umsekeli kamongameli uMnu. Phelekezela Mphoko uncedise lezimuli ngempahla zokusebenzisa.
Induna uChief Gampu utshele uSithandekile Mhlanga weStudio 7 ukuthi abantu bazakwehlukana babe ngamaqembu atshiyeneyo ukuthi bengcwabe ababhubhileyo ngelanga linye.