Izihlobo zabagulayo ezilethwa ezibhedlela ezinkulu zikahulumende eHarare sezibanjwa ngamandla ukudlula phambili, ukuyadinga usizo ezibhedlela ezizimeleyo, kusamukelwa abagula kakubi ngesikhathi odokotela bekhalala umsebenzi.
Lezi zihlobo bezibonakala zithatha izigulane zazo ukuyadinga usizo kwezinye izibhedlela ngoba abagulayo laba bengalutholi usizo lapha ezibhedlela okubalisa ese Harare Central Hospital kanye le Parirenyatwa Group of Hosipitals.
I Studio Seven iye kulezi zibhedlela ukuyazibonela isimo kulezi zibhedlela kwatholakala ukuba lanxa bekhona abalutholayo usizo, inengi labagulayo bagciniwe nje ezibhedlela.
Abakhulume le Studio Seven ngesikhathi bethatha izigulane zabo ukubasa kwezinye izibhedlela ezizimeleyo baveze ukuba bacetshiswe ukuba bazise ezibhedlela ezibalisa ese Avenues le West End.
Unkosikazi Makanaka Chagweda ngomunye wabagulayo odluliselwe phambili ngemva kokuba etshelwe ukuthi akula sizo angaluthola ePareirenyatwa kwathiwa aye eMichel Gelfand Clinic, okuyisibhedlela esizimeleyo.
Kuthi unkosikazi Onai Chibwe wase Rugare yena obesesibhedlela seHarare Hospital yena uveze ukuba useziyela e mapostorini njengoba engayanelisi inhlawulo ysibhedlela esizimeleyo.
Umnumzana Workfield Mlilo,yena ose umfowabo kuhlangothi lwabagula umkhuhlane wenqondo ngolwesine ngeviki ephelileyo, ucine esemthatha lamuhla esengolubhekise esibhedlela esise Mutoko ese All Souls Mission.
Ukwehla kwenani lezigulane lababuya ukuzobabona kulezi zibhedlela kubangelwa yikukhalala umsebenzi kwabodokotela abasanda kuphutsha izifundo zabo ama junior doctors sekuphazamise lalabo abaphila ngokuthengisa okufana lezithelo.
Unkosazana Tsitsi Phiri othengisa izithelo esangweni le Parirenyatwa Hospital utshengise ukukhathazeka phezu kokungahambi kuhle kwebhizimusi lakhe ethi usesesaba laye ukuba kuzaphetha sekumgulisa enqondweni njengoba into zimi manzonzo okwamanje kudaba lwezemali.
Kodwa abanye abakwezinye inhlangothi ezibhedlela abangathandaba ukubethwa ngamagama batshele iStudio seven ukuba kuzakuba yingozi nxa uhulumende engalungisisa udaba lwabodokotela kuphela engakhangelanga abanye bonke abaphatheke emsebenzini wezempilakahle okubalisa omongikazi, omabhalane labanye.
Baqonqosele ukuba uhulumende alungise udaba lwabo bonke hatshi ukuqakathekisa odokotela kuphela ngoba kunganyampisa inhliziyo zbanye bacine labo bekhalala umsebenzi.
Lokhu kusekelwe ngumnumzana Bigboy Maseko othi uvumelana lalo mbono okhuthaza uhulumende ukuba alungisise udaba lweholo hatshi kubodokotela kuphela kodwa lolwezisebenzi zonke zezibhedlela kanye lakwezinye ingatsha zikahulumende. Uthi uMaseko,umthandazo wakhe yikuba akayi kuhlaselwa ngumkhuhlane ozakwenza sibe khona isidingo sokuba ayedinga usizo kulezi zibhedlela ezinkulu zikahulumende.
Uzulu obeze ukuzadinga usizo esibhedlela se Harare Hospital ubebonakala ezihlalele kungekho sizo alutholayo lanxa besebekhiphe inhlawulo yokuhlolwa. Kuthi eParirenyatwa Hospital, beziphambana imota ezithwala abagulayo ama ambulances, ukubasa kwezinye izibhedlela ezizimeleyo.
Abanye bebekhanya bedanile bekhanya ukuthi sebephelelwe ngumcabango ngoba besithi kabalayo imali ebizwa yizibhedlela ezizimeleyo. Abanye njalo ngabathi sebelomcabango wokudinga imali zezimotha zokuya ezibhedlela zama mission ezinjengese Karanda eMt Darwini.
Abenhlanganiso ye Zimbabwe Hospitals Doctors Association bathi odokotela laba bathi bafuna ukwengezelelwa iholo lisuka kumadollar phose amakhulu amathathu-$282 lisiya kwadlula inkulungwane-$1,200 . Bakhala njalo ngemali ezihlawuliswa abahlala ezindlini zikahulumende ezisesibhedlela okwamanje zamadollar edlula amakhulu amabili- $250 kanye lezinye izimali okumele bazibhadalwe nxa bebizelwa izigulane ama on call allowances kanye lokunye okungaphathisa ukuthuthukisa umsebenzi wabo.