Izikolo zivaliwe ngoLwesihlanu eHarare lakoBulawayo lapho okwenzelwa khona umhlangano omkhulu webandla leZanu PF owe Congress lemidlalo yabasakhulayo eye African Union Sports Council Region Five Youth Games eqalisa ngeviki ezayo.
UMnu. Sifiso Ndlovu umqondisi wenhlanganiso yababalisi eye Zimbabwe Teachers’ Association utshele iStudio 7 ukuthi ukuvalwa kwezikolo lokhu kuzaphazamisa kakhulu izifundi ezingaphiwanga amaphepha emfundo atshengisa ukuthi ziyenze njani ezifundweni zazo ekupheleni komnyaka.
UNdlovu uthi lokhu kuzakwenza kubenzima njalo kuzifundi ezizafuna ukusuka ezikolo lapho ezifunda khona okwamanje. Abazali abalabantwana abafunda ezikolo lapho abahlala khona ema boarding schools, babikwa betshelwe lamuhla ukuthi izikolo zizavalwa masinyane.
Abanye abazali baphaphatheke baze bayafika ezikolo lezo khona ngoLwesihlanu. Bekumele izikolo zivalwe ngoLwesibili oluzayo.
Ibandla leZanu PF elizakwenza umhlangano walo omkhulu oweCongress ngeviki ezayo, likhangelelwe ukusebenzisa izikolo lezi ngesikhathi leso. Abazabe besemidlalweni yabasakhulayo bakhangelelwe ukwenza okufanayo.
IStudio Seven kayenelisanga ukukhuluma leziphathamandla zikahulumende ngodaba lolu. UGibbs Dube weStudio 7 uxoxe kabanzi loNdlovu oweZimta, ngaloludaba.
