Inengi Labantwana Lixotshwa Ezikolo Ngenxa Yokungabhadali
UMnu. David Coltart uthi kunzima ukuthi izikolo zingaxotshi abantwana abangabhadalanga amalevi ngoba zifuna imali yokusebenzisa.
Gande Chris, Sithandekile Mhlanga
09.01.2013
WASHINGTON — Abantwana besikolo abanengi baxotshiwe esikolo ngolweSithathu ngenxa yokungabhadali imbadalo yesikolo eyama school fees lanxa uhulumende engavumeli ukuthi baxotshwe nxa bengabhabhadalanga.
Kodwa abanye abaphathisikolo abakhulume leStudio Seven bathi kuxotsha kuphela labo abafunda bengabhadalanga imali zama levi hatshi ama fees.
Umphathintambo wezemfundo uMnu. David Coltart utshele iStudio Seven ukuthi kunzima ukuthi izikolo zingaxotshi abantwana abangabhadalanga amalevi ngoba zifuna imali yokusebenzisa. Ungezelele wathi kufanele abaphathisikolo babe lesineke bakhulumisane labazali abantwana bengakaxotshwa esikolo.
Isikhulumeli senhlanganiso ye Bulawayo United Progressive Residents’ Association UMnu. Roderick Fayayo utshele uChris Gande weStudio Seven ukuthi banengi kakhulu abantwana asebexotshwe esikolo.
Ingxoxo LoMnu. Roderick Fayayo
Kusenjalo, abanye ababalisi abasanda ukuqeqetshela ukufundisa emakolitshini bathi lokhu bengakatholi umsebenzi lokhu izikolo zivuliwe njalo bacabangela ukuthi abaphathi bezikolo baziqhatshela ababalisi abangaqeqetshenga ngemva kokufunjathiswa.
Umkhokheli wenhlanganiso elwela amalungelo ababalisi eye Progressive Teachers' Union of Zimbabwe uMnu. Takavafira Zhou utshele iStudio 7 ukuthi inhlanganiso yakhe isithole imbiko efanayo ezigabeni ezigoqela i Gweru, i Masvingo, kanye lakoBulawayo njalo isadingisisa ngaloludaba ingakakhulumi logatsha lukahulumende olwezemfundo.
Omunye wababalisi ongakatholi umsebenzi ngemva kokuqeqetsha ekolitshini le Hillside Teachers' College koBulawayo, okhethe ukubizwa ngokuthi nguTakunda kuphela utshele uSithandekile Mhlanga weStudio 7 ukuthi yena labanye bakhe obekufanele bafundise eGokwe South sebephelelwe ngumphako.
Ingxoxo LoTakunda