amalinks wokungena

Breaking News

IZimbabwe Inanza Ilanga Lokuqakathekisa Imisebenzi Yabakubutho


EleZimbabwe lithakazalele umnyaka wesimatshumi mathathu lane wokubunjwa kwevuyo lebutho ele Zimbabwe Defence Forces. Umongameli Robert Mugabe, utshele inkulungwane zabantu ezibuthene enkundleni yeNational Sports Stadium zinanza ikhefu lokunanza imisebenzi yabakubutho ele Defence Froces Day, ukuba, yena lohulumende bayayincoma imisebenzi emihle eyenziwa ngabe ZDF yokulondolza ilizwe.

Iqembu lomculo labakubutho yilo ebelithokozisa uzulu ngasikhathi sinye, indizamtshina zabo ziquma enkundleni ye National Sports Stadium ngoLwesibili ekuseni, njengomkhuba wabo wokuhlonipha leli langa ele Defence Forces Day lomkhokheli webutho umongameli Mugabe.

UMugabe uthi bekungelula ngaleso sikhathi ukubumba ivuyo lebutho ele ZDF, lapho kwamanyaniswa khona amaqembu amathathu abephatheke empini yenkululeko lababesebenza phansi kombuso wabacindezeli wabamhlophe.

Wathi limisebenzi yabakubutho ingapheleli kuleli kuphela kodwa bephathisa njalo emisebenzini yokuthuthukisa omakhelwane abasemazweni akunhlanganiso yomanyano wamazwe angezansi kwezwekazi le Africa – SADC kanye lemisebenzini yokulondoloza ukuthula enhlanganisweni yomanyano wamazwe abensundu eye African Union - AU.

UMugabe ubonge njalo inkokheli zamazwe aphathisa ukufuqa inhlanganiso ye Organisation of African Unity esisaziwa ngokuthi yiAfrican Union ebalisa uKwame Nkrumah owayengumkhokheli we Ghana, umnumzana Julias Nyerere wakwele Tanzania lo Souke Toure abayibona abasungula i-Committee ye African Liberation Committee – ALC ngenjongo yokuphathisa amazwe ayekade engakatholi uzibuse.

Wengeza uMugabe ethi amazwe abalisa ele Algeria, Egypt, Ghana, Cuba, China, kanye lele Soviet Union aphathisa kakhulu ngoncedo lwezikhali kanye lemfundiso kwezokuqgutshwa kwempi.

Uzulu yena unikeze imibone ehlukeneyo phezu kokunanzwa kosuku lwabakubutho kanye lalabo abalwela inkululeko yelizwe, ekhala ngendlela okukhethwa ngayo amaqhawe,kungaba ngasaphilayo loba atshonayo.

Umqondisi wenhlanganiso elwela ilungelo loluntu eye Combined Harare Residents Association – CHRA umnumzana Mfundo Mlilo uthi kungaba kuhle ngabe lokhu kwenziwa ngokuphatheka kwenhlangothi zonke hatshi ibandla linye kuphela.

Bakhona abaphiwe izicoco zokubancoma ngemisebenzi yabo emihle yokuvikela ilizwe kusukela ngesikhathi ilizwe liphakathi kwempi yenkululeko lalapho selithole uzibuse,abalokhe besesibuthweni,asebayekela lalabo abangazange bangene esibuthweni kodwa baphatheka empini yenkululeko.

Umkhosi walamuhla obusenkundleni yeNational Sports Stadium ungenwe zinkokheli zenhlangothi zonke zebutho, eze Politiburo ebandleni le Zanu PF, abammele amanye amazwe kuleli, abalwa impi yenkululeko, ababotshwa ngesikhathi abensundu belwisana labelungu kanye lomsekeli womkhokheli ivuyo lebutho le Namibia umnumzana Frederick Chilunzindila.

Umkhosi walonyaka wenziwe phansi kwesihloko esithi “ The Genesis of the Zimbabwe Defence Forces in defence of National Sovereignty, Social and Economic Development .”

Ibiminengi imicimbicimbi ebisenziwa zinhlangothi zabakubutho ukulibazisa uzulu okubalisa ukufola kanye lomdlalo othandwa ngabanengi owenguqu.

XS
SM
MD
LG