Iqembu elimela iZimbabwe emdlalweni kakhilikithi linqotshwe ngelePakistan ngama runs alitshumi lanhlanu emdlalweni wesibili owohlobo lweTwenty20 oqhutshelwe enkundleni yeHarare Sports Club ngoLwesibili.
Limpumela itsho ukuba iqembu le Pakistan linqobe nge 2 ka nya nxa sekuhlanganiswa lempumela eyomdlalo wakuqala wona ophele iqembu lezivakatshi linqobe ngama runs alitshumi lantathu ngeSonto edluleyo.
NgoLwesibili iqembu le Pakistan yilo eliqale ukutshaya ibhola lathola ama runs alikhulu lamatshumi amathathu lesithupha (136), okulinani elilibuthelela lakumdlalo wakuqala, umehluko kuyikuba emdlalweni wesibili lilahlekelwe ngabadlali abayisithupha phakathi kwama overs angamatshumi amabili ikanti emdlalweni wakuqala lilahlekelwe ngabadlali abayithoba minwe mbili.
Iqembu le Zimbabwe kuthe sekulithuba lalo ukuba litshaye ibhola lehluleka ukufikisa inani elibuthelelwe liqembu le Pakistan lathola ama runs alikhulu lamatshumi amabili lanye (121), lilahlekelwe ngabadlali abayithoba munwe munye kuma overs angamatshumi amabili.
Limpumela itsho ukuba iqembu le Zimbabwe lilokhu lingazake linqobe iqembu le Pakistan selokhu lawamaqembu aqala ukudibana kumidlalo yohlobo lwe Twenty20 njalo selidliwe kumidlalo eyithoba munwe munye.
Ekhuluma lentathelizindaba ekupheleni komdlalo umdlali weqembu le Zimbabwe uSean Williams uthe inkinga ababhekane lalo njengeqembu yikuba abadlali abaqala ukutshaya ibhola i top order ngesilungu baphanga bekhutshwe bengakabutheleli ama runs amanengi okwenza kube nzima kulabo abangena ngemva kwabo.
Iqembu le Zimbabwe lilakho ukuphindisela ukudliwa kwalo kumidlalo ye Twenty20 ngesikhathi lingqikilana leqembu le Pakistan kumidlalo emithathu eyohlobo lwe One Day International ezaqala kusasa ngoLwesine.
Umdlalo wesibili owohlobo lwe One Day International uzakuba khona ngoMgqibelo kuthi owesithathu njalo ungowokucina uzakuba khona ngoMvulo ozayo.
Yonke limidlalo izaqhutshelwa enkundleni ye Harare Sports Club esigodlweni.
