Iqembu elimela ilizwe le Zimbabwe emidlalweni ye African Games eqhutshelwa elizweni le Congo Brazzaville selilemendulo ezintathu ngemva kokuba untombazana womdlalo wokubhukutsha uKirsty Coventry ethole eyesibili eye golide kuthi iqembu le relay lathola eyombala wethusi.
U Coventry utholele iqembu le Zimbabwe imendulo yegolide eyesibili ngemva kokunqoba kumncintiswano we 200m individual medley ngoLwesine ikanti eyokuqala uyithole ngoLwesibili ngemva kokunqoba kuncintiswano we 100m backstroke.
Imendulo yesithathu njalo ingeyombala wethusi itholwe liqembu eliphatheke kumjaho we 4 x 100 medley ngemva kokuba liphutshe likundawo yesithathu.
Sikhangele umdlalo wenguqu;
Imidlalo yenguqu kusigaba se Castle Premier Soccer League ingena kuviki yamatshumi amabili lambili kulimpelaviki njalo amaqembu azadlala ngokulandelayo;
NgoMgqibelo iqembu le Harare City lizemukela ele Highlanders enkundleni ye Rufaro, iqembu elihlezi phezu kwengalane ele Chicken Inn lizadibana lele ZPC Kariba enkundleni ye Luveve, iqembu le FC Platinum lizadlala lele Dynamos ngase Mandava kuthi iqembu le Flame Lily lizangqikilana lele Hwange ngase Lafarge.
NgeSonto iqembu le Whawha lizemukela iqembu le Traingle ngase Ascot, iqembu le Dongo Sawmills lizadlala lele Chapungu ngase Vengere, iqembu le Caps United lizadibana lele Buffaloes ngase National Sports Stadium kuthi iqembu le Tsholotsho lizangqikilana leqembu le How Mine enkundleni eWhite City.
