amalinks wokungena

Breaking News

Iqembu leZimbabwe National Netball Team Lithola Imendulu yeGolide


Imidlalo yeAfrican Union Sports Council-Region-5-Youth-Games
Imidlalo yeAfrican Union Sports Council-Region-5-Youth-Games

Emidlalweni eyeAfrican Union Sports Council Region 5 Under 20 Games esaqhubeka koBulawayo, iqembu lesizwe elenguqu linqobe eleMalawi 2 ka 1, ngoLwesihlanu, okutsho ukuthi selizadlala leleNamibia kuma semi-finals.

Iqembu lesizwe elenguqu elama Mighty Warriors lona lanqontshwe ngeleBotswana 5 ka zero.

Kusenjalo, iqembu lesizwe elemidlalo yebhola lokuqaga ele Zimbabwe National Netball Team lithi lilokhu lithokozile ngemva kokunqoba eleSouth Africa 45 ka 37 ngoLwesine.

Bekungabizwa ozwayo ngoLwesihlanu enkundleni ye White City Stadium lapho obekungu tshiki lobhanqa amazwe la womabili angomakhelwane edinga imendulo yegolide.

Umqeqeshi weqembu lamantombazana la, uMnumzana Ropafadzo Mutsauki, uthi amantombazana adlale kuhle kakhulu okumsuthisileyo njalo bajabule okwamagama ikakhulu lapho bekhangela ukuthi iqembu leSouth Africa belibanqobile kuthange emdlalweni wabo wakuqala. Uthi bebezimisele ukuthi bathole imendulo yegolide kungakho ukugcwaliseka kwezifiso zabo kubatshiye bemanzi te.

Obebukele lumdlalo, uNkosikazi Melta Sithole uthi ujabule kakhulu ngokunqoba kwamankazana la asakhulayo njalo umdlalo wabo ubugcwalisa uzulu obebukele amadlabuzane. Uthi imidlalo le inika uzulu wakoBulawayo ithuba lokuzithokozisa ngoba kuvele azikho indawo lapho umuntu angayazikholisisa lemuli yakhe.

UNkosikazi Sithole uqhubeke esithi kuyajabulisa ukuthi idolobho leli lithole ithuba lokwakhelwa indawo zokudlalela ezilonhlonzi okuzathi lanxa imidlalo le isiphelile kusale kuthuthuke indawo ezinengi edolobheni. Uthi ulethemba lokuthi lezizindawo zizanakekelwa ngendlela ziqhubeke zisetshenziswa ngendlela okweminyaka eminengi ezayo.

Umnumzana Alfred Sibanda osebenzelana labantwana kumidlalo le, uthi kuqakathekile ukuthi amantombazana athole ithuba lokudlala bathuthukise izipho zabo. Uthi esikhathini esinengi abazali abakhululeki ukuthi babekele besiyahlala isikhathi eside bengekho ezindlini besesaba ingozi ezingawela abantwana kodwa nxa lezizipho zisenza benelise ukuyadlalela ilizwe labo banqobe, kulakho ukukhuthaza abanye.

Imidlalo le eqale mhlaka 5 kuyonale inyanga izaphela ngeSonto. Umcintiswano wemidlalo le ungenwa ngamazwe alitshumi adlala imidlalo egoqela ukugijima, ibhola lokuqaga, inguqu, ukubhukutsha kanye lokutshaya inqindi-boxing le judo.

XS
SM
MD
LG