Abathengisa amanzi baqhubekela phambili ngemisebenzi yabo kungakhathalekile ukuthi kulesinqumo sohlangothi olubona ngezamanzi olwe Zimbabwe National Water Authority-ZINWA sokuba imisebenzi le imiswe edolobheni leHarare.
Kulandela isinqumo seZINWA sokuba yonke imisebenzi yokuthengisa amanzi imiswe kuleli dolobho kusukela mhlaka 1 Mfumfu, 2014 abaquba lumsebenzi baqale ukukhulumisana le ZINWA ngenhloso yokuthi bazwisisane ngoba besithi inyathelo leli lizaphazamisa ibhizimusi labo.
Umnumzana Abel Mafoti uthi yena labanye bakhe lokhe bequbekela phambili bethengisa amanzi njengenhlalayenza baze bavumelane le ZINWA kuloludaba.
Umqondisi wenhlanganiso yezakhamuzi ze Chitungwiza umnumzana Admire Zaya uthi inyathelo le ZINWA alulasekelo lwe zakhamizi.
U Nkosikazi Mary Shindi ohlala emzini weMabelreign uthi baluntshwana sibili abantu abengenelisa ukugebha ama borehole ezindlini zabo ethi yena ngokwakhe wehluleka ukuthola imali edlula kunkulungwane ezine ukuba agebhe iborehole emzini wakhe ethi imisebenzi yabathengisa amanzi iyaphathisa amabhizimusi atshiyeneyo okugoqela abalamainkili alungisa inwele ngesikhathi u masipala engenelisi ukutholisa abantu amanzi.
UZaya uthi inkinga yikuba i ZINWA ithatha amanyathelo athile ingakakhulumisananga lozulu.
I-ZINWA ithi sokulomkhuba omubi wokugebha ama borehole ngenjongo yokusebenzisa amanzi ezindlini kodwa abantu becine sebesenza amabhizimusi okuthengisa lawo manzi isithi umsebenzi onje uyabe usudinga enye njalo imvumo etshiyeneyo ngoba kucina kusehlisa inani lamanzi atholakala phansi yenze njalo ukuba lemigodi yama borehole yezinye izakhamizi ezingathengisi amanzi icine isoma.
Ngokunjalo ithi abathengisa amanzi kumele beyowathenga endaweni ezinhlanu ezithi Dema Water Supple, Nyabira Water Supply, Parerehwa Water Supply, Gwebi Water Supply, Juru Water Supply le Henderson Rersearch Station.
Umnumzana Mafoti uthi ukwenza lokhu kungenza ukuba amanzi acine esedula ngoba indawo lezi zikhatshana kucina kubadalela indleko yamafuta ezimota. Uthi okwamanje bathengisa inkulungwane ezinhlanu zamalitre-5000litres, ngentengo engamatshumi athoba minwe mbili amadollar-$80 kodwa i ZINWA isifuna ukuba bebhadale amadollar amathathu kunkulungwane yama litre okuzenza ukuba becine bebhadale amadollar alitshumi lanhlanu-$15.00 kuma litre angu 5000 bengakabhadali abanini bama borehole lapho abathenga amanzi khona ethi okwamanje bakhetha ukuzisebenzela njengenhlalayenza.