Iziphepheli zeZimbabwe kweleSouth Africa sezemukele ngezandla zombili langenjabulo, inyathelo lehofisi yeziphepheli eMarabastad ePretoria lokwethula inhlelo ezizakwenqabela inkohlakalo ekutholeni amaphepha okuphephela.
Lihosifi ithi bonke abafuna ukuthola uncedo kule ihofisi abasezukufola kodwa bazafika bafake izicelo zabo emabhokisini bese belinda impendulo okuyinto ezabahlenga ekubhadaleni imali yesifumbathiso.
Ngomnyaka ophelileyo ihofisi yeziphepheli eMarabastad, ibengundaba mlonyeni ilizwe lonke ngemva kwembiko yokuthi iziphepheli zithwele amagabha avuzayo zihlawuliswa imali ukuze zithole usizo olungolwamahala.
Kuleziphathamandla okubikwa bezisebenza lezigangi ebezivuka ngovivi zizodinga inhlawulo kulabo abafuna ukuthola usizo. Abanye balezo zigangi bebelala emizileni ukuze ekuseni indawo zabo bazithengisele labo abafuna ukuba phambili.
Intathelizindaba yeZimbabwe Undumiso Mlilo uthi, ingxabangxoza ebiseseMarabastad ibisibangele ukuthi abanengi bevele bengasazihluphi ngokulungisisa amaphepha abo.
"Zinengi kakhulu inhlupho abantu akade behlangana lazo. Ezinye zakhona yikuthi bebephathwa kabi even laba onogada nomanje bebamisa emzileni bebatshaya, bebamisa elangeni, even ma bekhuluma labo abakhulumi njengabantu kungathi bakhuluma lenyamazana".
Ihofisi yeMarabastad ithi isithole icebo lokuwuqeda du lumkhuba wenkohlakalo. Embikweni owethulwe yile ihofisi, kusukela mhlaka 29 Zibandlela lonyaka bonke abafuna usizo kule ihofisi kuzafuze bathi nxabefika bafake izicelo zabo emabhokisini azabe ebhalwe kwacaca ukuthi ngawasiphi isicelo.
Lezi zicelo okufuze bazifake phakathi kwehola lesikhombisa kusiya kwelesitshiyagalolunye ekuseni zigoqela abazodinga ukuphephela ngokokuqala, abafuna ukwengezelela amalanga loba abalahlekelwe zincwadi zabo zokuphephela.
Izisebenzi sezizathatha lezi zicelo ziyezihluza bese kuqala ukuza impendulo ngemva kwehola lengxenye.
Lokhu kutsho ukuthi akusekho osezalala efolile emzileni, akusekho ozabhadala ukuze athole indawo phambili emzileni, njalo akusekho okuzadingeka ukuthi abhadale ukuze isicelo sakhe sifinyelele kuziphathamandla zala amahofisi.
Leyinto esiyemukelwe ngezandla zombili yizizalwane zeZimbabwe okuyizo ezinengi kula amahofisi.
Isizalwane seZimbabwe unkosazana Silibaziso Nkomo uthi besebethwele amagabha avuzayo.
"Mina ngibona angathi kuzabangcono ngoba amalong queues, lecorruption ekade isikhonangale, we were spending a lot, imali, ukudiza lokutshontshelwa everything. Bekungaqondakali ukuthi kusebenza njani ngicabanga ukuthi le ine system ekhona izosisiza kakhulu".
UMankomo uthi inengi beselivele selikhalele lokwengeza insuku emaphepheli azo okuphephela njengoba bekuvele kungasangeneki nxa ungabhadalanga.
"Almost the whole year ngitshitshela khonangale. Almost close to R2000 imali engiyiluzileyo, itransport lekudizeni khonangale abantu belokhu bethi sizakwenzela sizakwenzela".
UNdumiso yena uthi lelinyathelo kufuze lilandelwe yikubotshwa kwabo bonke abalomkhuba wokufumbathisa kule ihofisi.
"Kumele ukuthi babone ukuthi laba abvele becorrupt wthin the system , bayakhithswa, njalo laba omagumaguma amapholisa awabuye akhiphe lezi izgebenga ngoba abanye bakhona futhi ngabantu ababuya eZimbabwe. Ababuye bebasuse eMarabatsad bengabi belokhu bezulazula phandle ngoba yibo abacina bebamba inkunzi abanye besestha abantu abayabe bezihluphekela bezozama impilo khonaphana eHome Affairs".
IZimbabwe yiyo elabantu abanengi abafika eMarabastad bezodinga ukuphephela kweleSouth Africa okokuthi le ihofisi ibasiza kabili ngeviki.