amalinks wokungena

Breaking News

Izizalwane zeZimbabwe Ezise Botswana Kazelatshwa Ezibhedlela


Ezinye izizalwane zeZimbabwe eBotswana zikhonona ngokuthi azitholi usizo ezibhedlela ngenxa yokuthi azilamaphepha aqondileyo awokuhlala elizweni.

IBotswana ithi yona inceda labo abasesimeni esibi kuphela noma bengelamaphepha.

Umama uMaNdlovu yena oleminyaka engamatshumi ayisithupha (60) uthi usexotshwe kanengi emaklinika esiyadinga uncedo lwabongi ngenxa yokuthi akalamaphepha okuhlala eBotswana.

uMaNdlovu uthi ayisikho kwakuqala exotshwa ngenxa yokungabi lamaphepha…

Uqhubeke ethi uyazi abanye ababiselwa emuva noma nje isimo somkhuhlane sisezingeni esibi. UMaNdlovu uthi bayabizelwa amapholisa uma bengelamaphepha…

Udubo lolu kukhanya lubheke ngitsho lalabo abalamaphepha okuhlala elizweni. UPeterson Sibanda uthi bengakelwatsha kuqala kudingakale ukuthi bayehlawula kweyinye ihofisi ekhatshana lesibhedlela…

Omunye oweZimbabwe oseGaborone, uMnqobi Ncube uthi uhulumende weBotswana kumele azibuze ukuthi kuyini okuqakathekileyo phakathi kwempilo yomuntu lamaphepha.

Isizalwane seBotswana uBaboki Gopolang uthi uhulumende wakhe kumele ananzelele ukuthi ukuthola impilakahle lilungelo lomuntu wonke…

Isikhulumi sesibhedlela esikhulu sePrincess Marina eGaborone uDonnell Kutlapye utshele iStudio 7 ukuthi labo abasesimeni esibi yibo abathola usizo noma bengelamaphepha. Kodwa abanye bavalelwa ngaphandle…

Okwenzakalayo yikuthi labo abasesimeni esibi yibo abathola uncedo, kodwa abanye abafuna uncedo nje kumele bakhiphe amaphepha akhombisa ukuthi balelungelo lokuba selizweni.

Umongameli Ian Khama weBotswana wacela ukuthi abantu, kungakhethi mhlobo, bathole usizo ezibhedlela. Wethula lumbiko ngemva kokukhonona kwabomama abavela eZimbabwe ababekhulelwe kodwa bancitshwa usizo ngesizatho sokuthi abalamaphepha wokubaseBotswana.

XS
SM
MD
LG