amalinks wokungena

Breaking News

Kudaba Lokutshaywa Kwabokuza, Izizallwane zeZimbabwe Zhihlangana leze South Africa


South africa violence
South africa violence

Izizalwane zeZimbabwe okugoqela umkhokheli webandla leZAPU umnumnzana Dumiso Dabengwa bahlanganyele lamakhulu ezizalwane zakweleSouth Africa eziqede ubusuku bangoLwesibili emlindelweni wokulwisana leXenophobia oqhutshelwe eConstitution Hill eJohannesburg. UDabengwa uthi ukuzimisela kwezizalwane zakweleSouth Africa ezingene umlindelo lo kanye lamanyathelo asethathwa nguhulumende agoqela ukuthumela ibutho ukuthi liyevikela abakwamanye amazwe, kukhomba ukuzimisela okukhulu empini yokulwisana lokuhlaselwa kwabakwamanye amazwe.

Iziphathamandla zikahulumende esabelweni seGauteng, inkokheli zamabandla ezenkokho lawezombusazwe, inkokheli zenhlanganiso zikazulu labantu makhaza kweleSouth Africa bonke bebethe gwaqa eConstitution Hill becabangisisa ngabangakwenza ukuqeda udlakela lokuhlaselwa kwabakwamanye amazwe.

Abebekulo umlindelo balayithe amakhulukhulu amakhandlela besithi yindlela yokuzwelana lezihlobo zalabo asebebulewe kulolu dlakela kanye lalabo abatshwaywayo lalalo asebebalekile emizini yabo.

Umkhokheli webandla leZAPU umnumnzana Dumiso Dabengwa ngomunye walabo abaqede phose ubusuku bonke kulo emlindelweni wokulwisana lokuhlaselwa kwezizalwane zakwamanye amazwe.

Umgcinisihlalo we Board ye Brand South Africa uNkosikazi Chichi Maponya, uthi ixuku labantu elize kulo umlindelo likhombisa khona ukuthi inengi lezizalwane zakweleSouth Africa ngabantu abathanda ukuthula.

Isizalwane seZimbabwe umnumnzana Patric Matsinanise laye ngomunye wabebelindeli besithi phansi ngexenophobia.

Umnumnzana Dabengwa ukhuthaze izizalwane zeZimbabwe ukuthi zikuzwisise ukuthi liqiniso elingavikekiyo uthi ukufika kwazo kweleSouth Africa ngobunengi, sekusenza ukusilela kwenhlelo ezifana lemisebenzi kubonwe ngabanye njengento ebangelwa ngabakwamanye amazwe.

Oka Dabengwa uthi inkokheli zeZimbabwe kufanele zisebenze gadalala ukuthuthukisa ezomnotho ukuze izizalwane zeZimbabwe ezihlukunyezwayo emazweni zenelisa ukubuyela ziyeselela imuli yazo zisekhaya.

UBenedict Nhlapho usipha loludaba eseJohannesburg kweleSouth Africa.

XS
SM
MD
LG