Umphathintambo wezamafekithali uMnu. Welshman Ncube uthi kungamanga ukuthi wanika inkampani yamandiya iEssar Africa Holdings okwenjiwayo okuyisilinganiso se 40 billion metric tonnes kulotshelwana isivumelwano lenkampani le sokuvuselela iZimbabwe Iron and Steel Company.
Umnu. Ncube uthi kulabanye abakuhulumende womanyano abafuna ukuthi isivumelwano lesi sidilike ukuze bathole inzuzo kokwenjiwa yi nkampani esanda kubunjwa yi Essar iNew Zimbabwe Steel Limited.
Uthi okunengi okwenjiwayo okumele kunikwe iessar okubanjwe yinkampani eyayidlelana le Ziscosteel, iBuchwa Iron Mining Company, sokusaziwa njalo sokuzanikwa inkampani le.
Umnu. Ncube uthi kulokunye okwenjiwayo okungani kusahluzwa nguhulumende okuse Mwenezi, eMasvingo okumele lakho kube ngaphansi kwe New Zimbabwe Minerals ye Essar Africa Holdings esanda kubujwa.
Konke lokhu kusebizweni lika Mnu. Roderick Mumbire owake wasebenza eZiscosteel kodwa kukhanya esetshenziswa ngezinye iziphathamandla zebandla le ZANU PF.
Inkampani ye Essar lokhe isala ukubhadala iholo lezisebenzi ngenxa yokuthi kayikatholi ama share certificates kanye lokwenjiwayo.
Umnu. Ncube uthi sokuseduze ukuthi iEssar inikwe ama share certificates kanye lokwenjiwayo okwakungaphansi kwe Buchwa Iron Mining Company.
Ingcwethi kwezenotho uMnu. Rejoice Ngwenya uthi okwethusayo yikuthi kulabantu abakubandla le ZANU PF abafuna ukuhuquluza inotho ye Ziscosteel uzulu ehlupheka.
Kasizange Sinike iEssar Africa Holdings Insimbi Ezingenjiwanga Eziyi 40 Billion Metric Tonnes - Mnu. Ncube
- Gibbs Dube
