Amapholisa eHarare ngoLwesithathu atshaye kakubi abasekeli beMDC-T ekade betshengisela besola uhulumende kaMongameli Mugabe ngokwehluleka ukusungula imisebenzi lokulungisa udaba lomnotho oqhubeka ubhidlika.
Ukutshengisela lokhu kuqoqwe ngabasakhulayo balelibandla njalo amapholisa ake abopha abameli bebandla leli ephalamende ababili abathi uMnu James Maridadi loEric Murai kanye lentatheli ezimeleyo uAndrison Manyere.
Abathathu laba bakhululwe ngokuya kwelanga, kodwa lelibandla lithi manengi amalunga alo angaba elokhu evalelwe esitokisini phezu kokutshengisela lokhu.
Ngeviki edluleyo iMDC-T iqhube uhlelo lokutshengisela phezu kodaba olufanayo eHarare kwabotshwa amalunga alo ayisikhombisa agoqela ilunga ledale lephalamende.
Abantu laba lokhu bevalelwe lanxa umthethwandaba ubuthe bakhululwe ngoLwesihlanu.
IMDC-T ithi uhulumende kaMugabe kumele asungule imisebenzi edlula izigidi ezimbili eyathenjiswa libandla lakhe likhankasela ukhetholwanyakenye.
IStudio Seven ixhume isiphathamandla salelibandla uMnu Abednico Bhebhe yena osole kakhulu amapholisa.