Umpathintambo obona ngendaba zesabelweni seMashonaland Central umnumzana Martin Dinha, ubikwa esebotshiwe esetheswa amacala okungethembeki awe corruption.
Uhulumende ubikwa esithi uDinha, oseke wamiswa phambi komthethwandaba wasebenzisa isikhundla sakhe okungayisikho ngokuhlawulisa umlimi omhlophe owe Muzarabani umnumzana Guy Frank Dollar isifumbathiso senkulungwane ezingamatshumi ayisithupha zamadollar-$60,000.
Ingwalo ezisemthethwandaba ziveza ukuba limali yayingeyokuthenga uDinha ukuthi avikele umlimi omhlophe wegwayi lo ukuze engathathelwa iphulazi lakhe leMuzarabani elaselimele lithathwe nguhulumende.
UDinha, othi useke wathola iphasili elohlamvu lombhobho njenge ndlela yokumethusela ilombiko njalo othi nxa engasatshiyanga isikhundla alaso ulakho ukuwelwa yingozi eyahlangana labanye abanjengomuyi owayebona ngenhlelo zebandla le Zanu PF umnumzana Elliot Manyika, owafela engozini yemotha ngomnyaka ka2008.
Ekumisweni kwakhe phambi komthethwandaba kamantshi owe Bindura ngoLwesithathu ube emelwe ligqwetha lakhe umnumzana Tapson Dzvetero, wahlauliswa isibambiso senkulungwane eyodwa yamadollar-$1,000 lokuthi abuye azozibika emapholisa ngoLwesihlanu maviki wonke, njalo azonikeza amapholisa ingwalo zakhe zokuhambisa engalokothi ukuphuma emzini wakhe.
Ingwalo ezisemthethwandaba ziveza njalo ukuthi uDinha wasebenzelana loSaineti Magore Madzamba lo Tsitsi Nyika ukuze athole imali evela kuDollar.
Umtshutshisi uChris Mutangadura ekulobeni lezi ngwalo ubethe ukuthi uMartin Tafara Dinha wemukela njalo wagcinisa inkulungwane ezingamatshumi amathathu zamadollar-$30,000 ku account yakhe eyebhanga lePOSB.
UDinha, uselesikhathi ephuma ezindabeni ekhanya ehluphana lezinye iziphathamandla zeZanu PF ekuqubhekeni kokulwisana kweziphathamandla zaleli bandla. Ubekebalelwa kulabo abasekela imhuli kamongameli Robert Mugabe kodwa khathesi usesetheswa umlandu wokuba ngomunye wabasekela uNkosikazi Joice Mujuru owaxotshwa esikhundleni somsekeli kamongameli welizwe lebandla.