Kukhale imbhobho abohlangothi olulondoloza emajele abe Zimbabwe Prison Services bacina bevalela isikhulumeli seCrisis in Zimbabwe Coalition, uEdgar Gweshe labanye ababili, ngesikhathi besethekelela eHarare Remand Prison, ukuyabona abaphila ngokuthengisa abalokhe bevalelwe kusukisela ngeviki edluleyo.
Imibhobho ibikwa izwakale ikhala abalondoloza izibotshwa emajele bebikwa bedubula phezulu, ukusabalalisa ixuku labantu, ngemva kokuba esinye seziphathamandla zemajele sikhulumisane lequla labavele enhlanganisweni ezehlukeneyo zizokwethekelela abaphila ngokuthengisa laba, ukubazisa ukuba lapho abaze khona kuyindawo engavunyelwayo, sasesitshela abanye baso ukuba badubule.
Ngesikhathi loludaba lulotshwa, igqwetha uAdvocate Tonderai Bhatasara, olilunga leZimbabwe Lawyers for Human Rights (ZLHR), nguye othunywe ukuyamela abathathu laba kodwa wavinjwa ukukwenze lokho.
Eyinye yenkokheli yalezinhlanganiso engabotshwana ibe lomhlangano lentathelizindaba, owenzelwe e Media Centre lamuhla ekuseni, wokutshengisa usekelo kulabo abavalelweyo, abangamatshumi amabili.
Ababotshiweyo lokhe begciniwe eRemand, eHarare Central Prison, kuze kuyefika umhla ka 4 Ncwabakazi, ngemva kokuncitshwa ithuba lokubhadala imali yesibambiso eyebail ngeviki edluleyo.
Zitshengise ukukhathazeka ngokwenza kukahulumende ongazihluphiyo ukungena imihlangano yokubonisana phezu kokudinga indlela zokululungisisa inhlupho zabaphila ngokuthengisa ezitaladeni laba,ekhetha ukusebenzisa udlakela.
Isikhulumeli se Harare Metropolitan Residence Forum, okungumanyano wenhlanganiso ezimela uzulu eHarare, umnumzana Marvelous Khumalo, uthi ziyabadanisa kakhulu izehlakalo lezi.
Ibikhona inkokheli evele kunhlanganiso emela izisebenzi ye Zimbabwe Congress of Trade Unions – ZCTU, layo itshengise ukukhathazeka ngezehlakalo lezi.
Unobhala jikelele enhlanganisweni yezisebenzi umnumzana Japhet Moyo, uthi akubaphathi kuhle lokho osekusenzakala kwabaphila ngokuthengisa.
UMoyo ukhuthaza uzulu ukuba amanyane ekusoleni izenzo zikahulumende njengoba kusobala ukuba izinto khona zizaba nzima ngamandla kulandela isinqumo sokuxotshwa kwezisebenzi mahlayana esithethwe lidale le Supreme Court ngeviki edluleyo.
Abavalelweyo babalisa umgcinisihlalo weNAVUZ umnuzana Stan Zvorwadza, umqondisi wayo umnumzana Samuel Makunde kanye lophethe uhlangothi olubona ngokuqhutshwa komsebenzi kiyo unkosazana Lucy Makunde.