Kulokuxokozela okukhulu kuZanu PF lapho okuphoselwana aqhatha kubangwa ozathatha isikhundla sikaMongameli Robert Mugabe oseluphele.
Kambe kuyini okungenzakala kubandla leli nxa uMugabe engehlelwa yingozi kumbe asitshiye? Abanye bathi kungaba lesiphansi phezulu ngemva kokuxotshwa kowayengumsekeli kaMugabe, uNkosikazi Joice Mujuru, nyakenye ecatshangelwa ukuthi wayencedisana labanye emizameni yokukhipha uMugabe esikhundleni.
Sokulabanye ababizwa ngokuthi yiGeneration 40 asebebhonga kubandla leli. Isigaba 101 sesisekelo sombuso welizwe leZimbabwe sikubeka sobala ukuthi kumele umsekeli wakuqala kamongameli athathe isikhundla sikamongameli nxa engabhubha kumbe esesehluleka ukuqhuba umsebenzi ngemfanelo.
Othatha isikhundla lesi uyabe ekubandla elibusayo njalo kumele aqedise umsebenzi kamongameli kuze kuyefika isikhathi sokhetho olulandelayo.
Kodwa-ke ingcwethi kwezombusazwe labanye abakubandla leli bathi kungahlupha kakhulu ukuthi isikhundla lesi sithathwe ngumsekeli kamongameli uMnu. Emmerson Mnangagwa ngenxa yokuxokozela okumangalisayo kubandla leZanu PF.
Bakhona balendeli beZanu PF abanjengoMnu. Nkosilathi Jiyane abathi kuzamele kulandelwe isisekelo sombuswe welizwe lesebandla le Zanu PF nxa uMugabe engehlelwa yingozi.
Uthi kalaqiniso lokuthi ngubani ongathatha lesisikhundla loba nje abanengi becabanga ukuthi kungaba ngumsekeli wakhe uMnangagwa kumbe umkakhe uNkosikazi Grace Mugabe.
Ingcwethi kwezombusazwe ezimele yodwa, uMnu. Mmeli Dube ucabangela ukuthi kuzaba lokulwisana okumangalisayo uMugabe engatshiya umsebenzi.
Uthi kungamangalisa nxa uNkosikazi Mugabe engangena esikhundleni lesi.
Lokhu kusekelwa nguMnu. Mlamuli Nkomo othi ibandla leli selidungeke okumangalisayo ngodaba lomuntu ongathatha isikhundla sikaMugabe.
Uphinde wathi uNkosikazi Mugabe kwezombusazwe ufanana lomuntu esihlahleni somhlali.
Uzulu uthiyile indlebe emelele ukuzwa ukuthi kambe ingasala kubani ingqobe yombusazwe ngesikhathi leGeneration 40 isithobile kubandla leZanu PF.