EleZimbabwe liphawule okusemthethweni umkhankaso we African Union wokuqeda udubo lokwendiswa kwamantombazana esesemancane, phansi kwesihloko esithi “ We are girls and not brides”, lapho umka mongameli welizwe, unkosikazi Grace Mugabe athe ukubathena abenza lokhu kungaphathisa ekuthini besabe abafisa ukulandela lumkhuba.
Lumkhosi wenzelwe ehweteleni yeHarare International Conference Centre, ngokusebenzelana kwenhlanganiso ezibalisa eyomanyano wamazwe abensundu eye African Union, eyamazwe womhlaba i-United Nations kanye lohulumende weZimbabwe.
EleZimbabwe liba ngelakuqala ukuphawula lumkhankaso kukhangelwa ukuba yilo eliphethe isikhundla sokuba ngumgcinisihlalo we AU.
Unkosikazi Mugabe ukhala langendlela imithethwandaba ephatha ngayo indaba zokuhlukuluzwa kwamantombazane, bebanjwa ngamandla ukungena emendweni besesebancinyane ethi ufisa ngabe bagwetshwa izigwebo ezilukhuni njengendlela yokulwehlisa loludubo oselubhahe kangaka.
Wakhuthaza amalunga edale lephalamende ukuba baphange balungisise imithetho, ihambelane lesisekelo esitsha sombuso.
Bezikhona iziphathamandla ezivele enhlanganisweni ezehlukeneyo ezigoqela onguyena okhokhela kulomkhankaso uGoodwill Ambassador unkosikazi Nyaradzi Gumbonzwanda.
Unkosikazi Gumbonzwanda uthi lumkhuba yinto emzwisa ubuhlungu ekuzwisisa njengoba unina kungomunye owabanjwa ngamandla ukwenda ngemva kokumiswa izifundo zakhe eku grade three.
Okusekelwe ngumqondisi we Dot Youth Organisation,umnumzana Sibusiso Bhebhe laye otshengise ukukhathazeka phezu kwezehlakalo zokwendiswa kwamantombazana emancane.
Wengeza uBhebhe ethi kumele ilungisiswe imithetho ecatshwa ngayo yilabo abenza lolucuku okubalisa eyemitshado.
Unkosikazi Bester Moyo uligqwetha elisafundela umsebenzi enhlanganisweni ye Justice for Children ephatheke ekutholiseni usizo kwezemithetho lapho sebehlukuluziwe. Utshengise ukuwujabulela lumkhankaso unkosikazi Moyo. Usole labo abacatsha ngesintu bona kuyizigangi ezihlukuluza abantwana.
Isilinganiso samatshumi amathathu ekhulwini eZimbabwe-30% , samantombazane sibikwa lisendiswa besesebancinyane bengaphansi kweminyaka elitshumi lasitshiyagalombili.
Isigaba esilenani eliphezulu kungese Mashonaland Central, kulandele ese Mashonaland West kanye lese Masvingo. Isigaba sakoBulawayo sibikwa siyiso esilenani eliphansi labendiswa besesebancinyane.
Amalunga edale lephalamende yabantwana ithethe lelithuba ukunikeza umkamongameli incwadi yezikhalazo phezu kokuhlukuluzwa kwabantwana.
Ungenwe zinkokheli kungatsha zikahulumende, inhlanganiso ezikumanyano wamazwe omhlaba i UN, iqula elivele emahofisini esigodlo se AU, inhlanganiso ezilwela amalungelo abantwana kanye labesifazane kanye labo abantwana.
Bebekhona njalo abekade belibazisa uzulu ngemiculo etshiyeneyo okubalisa iqembu lezokuhlabela lamapholisa kanye lamalunga esifazane ebandleni leZANU PF.
