amalinks wokungena

Breaking News

Izakhamizi zeChitungwiza Zisola Ukwakhiwa Kwesibhedlela seChitungwiza Esitsha


Izakhamizi zeChitungwiza zithi inyathelo lokwakha isibhedlela esihle sakulezinsuku edolobheni leli akusoke kubasize ngalutho ngoba bevele bezidubekela belwisana lokuthi bethole khona ukudla nje abangaphila ngakho nsuku zonke.

Isibhedlela se Chitungwiza sithi sesizakwakha siqhela sithuthuka ukuze sibe ngesakulezi nsuku ngomnyaka ozayo esizenelisa ukuquba imisebenzi yaphezulu efana lokuhlinza, ukuhlolwa inhliziyo I cardiology le encology lokunye njalo silakho ukusetshenjiswa langabantu abalezikhundla zaphezulu.

Umqondisi wenhlanganiso yezakhamuzi ze Chitungwiza umnumzana Marvelous Khumalo uthi noma umsebenzi lo uyinto eyamukelekayo njengoba iletha intuthuko endaweni le ukhanya uyikumotsha imali ngendlela engasoke iphathise abantu makhaza ngemva kokubona umumo womsebenzi onje:

Umnumzana Admire Zaya wenhlanganiso ye Chitungwiza progressive Residents association uthi okudanisayo yikuba umsebenzi omkhulu kanje wenziwa kungela kukhulumelana lezakhamuzi ethi akaboni kudingakala ukwakha isibhedlela esikhulu kangaka sona esinye sesivele sikhona kodwa singenelisi ukusebenza kakuhle. Uthi lesi sibhedlela sizakuba ngesabantu abalemali ethi bona njengezakhamuzi abalani laso ngoba senziwa bengasinxenye yaso.

U Khumalo uthi okwamanje noma abantwana abaleminyaka engaphansi kwemihlanu labantu abaleminyaka edlula engamatshumi ayisithupha lanhlanu-65 kumele belatshwe kungelambadalo kulesisibhedlela bayabhadaliswa.

UKhumalo uthi imihlangano abazama ukuyibamba lenkokheli zesibhedlela zingenwa langama CIO okucina kusiba nzima ukuthi bekhulumelane bekhululekile.

Abazi ngokwenzakalayo kuloludaba bathi umongameli Robert Mugabe nguye ophathisa ngemitshina lama computer esekela isibhedlela lesi. Lokhu ukwenza ngoba umqondisi walesi sibhedlela kungu Dokotela Moyo yena alobudlelwano laye obukhulu ngoba nguye owelapha umuyi unkosikazi Sally Mugabe ngesikhathi elesifo sezinso. Asenelisanga ukubamba uDokotela Moyo kuma khalekhukhwini wakhe kodwa ubikwa ezindabeni esithi isibhedlela sakhe sivele silomkhuba omuhle wokuphathisa abantu abaswelayo njalo umsebenzi lo uzadalela abantu imisebenzi emitsha.

Isibhedlela se Chitungwiza silabodokotela abanengi abavela kwele China lase Cuba.

XS
SM
MD
LG