Uhulumende weSouth Africa usesungule uhlelo lweOperation Pyramid ngenjongo yokuthi amapholisa, amasotsha, labogatsha olubona ngokungena kwabantu elizweni basebenze ndawonye ekuvaleni ngci imingcele yelizwe ukuze kungasabi khona muntu kumbe impahla ezizangena elizweni ngokungekho emthethweni. Izizalwane zeZimbabwe zithi loluhlelo luzakwenza impilo zabo zibe nzima kakhulu.
Esethula uhlelo lweOperation Pyramid, eKruger National Park, umphathintambo wogatsha lwendaba zasekhaya kweleSouth Africa umnumnzana Malusi Gigaba uthe loluhlelo lujonge ukwenqabela yonke imisebenzi yokungena kwabantu lemphahla elizweni ngokungekho emthethweni.
Phansi kweOperation Pyramid, amasotsha, amapholisa lababona ngokungena kwabantu elizweni bazasebenza phansi kobukhokheli bunye, ekwenqabelni ukwephulwa kwemithetho ekungeneni kwempahla labantu elizweni. Lamaqula azabetholakala endaweni zokungena abantu lemphahla kanye lemingceleni yelizwe lapho abantu abafohlela khona ngokungekho emthethweni.
Inengi lezizalwane zeZimbabwe lithi ukwethulwa kohlelo lweOperation Pyramid zindaba ezimbi kakhulu kubo. Lobanje ukuthathwa kwamaphasipoti sekwenziwe kwaba lula eZimbabwe, banengi kakhulu abalokhu befohla umgcele weSouth Africa ngokungekho emthethweni.
Abanye yilabo abasebenza kweleSouth Africa bengelayo yona iphasipoti besekusithi abanye yilabo asebeqede insuku zabo ezingamatshumi ayisitshiyagalolunye eziphiwa isethekele ngasinye emnyakeni.
Isizalwane seZimbabwe umnumnzana Cain Ndlovu uthi loluhlelo selubafake phakathi kwetshe lembokodo, ngakho inqobe sezikuhulumende weZimbabwe ukuthi alungise izinto ekhaya njengoba amathuba okuyazizamela kweleSouth Africa esevaliwe. Uthi okwakuqala bafuna kuqedwe zonke ezombusazwe ezixotsha abantu elizweni. Uthi nxa ezombusazwe sezilungisiwe, uhulumende ulomlandu wokukhanga abamabhizimusi ukuthi bezosungula inhlelo zabo elizweni ukuze kuvulwe wonke amankampani avalwayo abantu bethole imisebenzi.
Uhlelo lwe operation Pyramid luza ngesikhathi lapho abakwamanye amazwe bevele bethwele nzima ngohlelo lwe Operation Thanyela oselubangele ukubanjwa kwabanengi abakwamanye amazwe bephindiselwa ekhaya ngenxa yokuthi baselizweni ngokungekho emthethweni.