Owayengumdlali womdlalo wenguqu edlalela iqembu le Highlanders uMelusi Mabaleka Sibanda usesungule umncintiswano wabasakhulayo ozadlalelwa ngamaqembu adlala eko Bulawayo obizwa ngokuthi yiMabaleka Football Tournament.
Umncintiswano wakuqala owe Mabaleka Football Tournament uzakuba khona ngoMgqibelo kulimpelaviki enkundleni ye Hartsfield njalo uzangenwa ngamaqembu athi ele Bantu Rovers, okuyilo eliphutshe imidlalo yalonyaka lihlezi phezu kwengalane yemiklomelo kuhlangothi lwabaleminyaka engaphansi kwelitshumi lathobaminwe mbili kusigaba se Bulawayo Province Junior League, ele Highlanders eliqede likundawo yesibili, ele Chicken Inn eliphutshe imidlalo likundawo yesithathu kanye lele Makhandeni Pirates eliqede lisendaweni yesine.
Ekhuluma emkhosini wokuphawulwa ngokusemthethweni komncintiswano uNkosiDube, ongomunye wabasebenza ndawonye loMabaleka, uthe lumncintiswano uyindlela yokukhuthaza abasakhulayo ukuba badlale ngokuzimisela umdlalo wenguqu ngoba bengathola indlela yokuziphilisa.
Isikhulumeli sabaqoqi bomcintiswano uJohnSibanda laye ugcizelele ukuba umdlalo wenguqu ulakho ukunqanda abasakhulayo ukuba bengaphatheki ezintweni zokuganga.
Imidlalo iyaqala ekuseni ngehola letshiyagalolunye njalo umdlalo wakuqala uzakuba phakathi kweqembu le Makhandeni Pirates lele Highlanders kuthi ozalandela uzakuba phakathi kweqembu le Chicken Inn lele Bantu Rovers.
Amaqembu azanqoba kumidlalo yakuqala azadibana kufinal njalo azaphiwa amakawuso okuvunula ngesikhathi edlala kuthi iqembu elizanqoba lizathola inkezo lemendulo zegolide kuthi elizanqotshwa lizathola imendulo zesiliva.
Kuzakuba khona njalo imivuzo ezaphiwa unozinti ozabe ebambe okwedlula abanye kanye lomdlali ozancinta abanye bonke.
Isiphathamandla senhlanganiso ye Zifa uMkhululi Mthunzi utshayele ihlombe uMabaleka ngesenzo sakhe esokuqala umncintiswano odlalelwa ngabasakhulayo.
Abaqoqi balumncintiswano bathi isifiso sabo yikuba limidlalo iyenziwe minyaka yonke njalo ikhule idlalelwe ngamaqembu amanengi.