EleZimbabwe liphawule okusemthethweni umuthi we Rotavirus Drug, wokuvikela isihudo se Rotavirus Diarrhoea, obikwa usukusibanga sesibili emikhuhlaneni ethatha impefumulo yabantwana abaleminyaka engaphansi kwemihlanu eZimbabwe ngemva kwesihlabo.
Umbuthano wokuphawula okusemthethweni ukusetshenziswa kwalumuthi wenzelwe esibhedlela se Parirenyatwa Group of Hospitals eHarare ngoLwesithathu ekuseni.
Owethule umbiko wakhe emmele umphathintambo wezempilakahle u Dr David Pagwesese Parirenyatwa, u Principal Director kulolugatsha lwezempilakahle, umnumzana Christopher Tapfumaneyi, utshele lumbuthano ukuba lanxa inhlelo zokunikeza abantwana lumuthi obavikela kulesi sihudo se Rotavirus Diarrhea ngomnyaka ka 1999, eleZimbabwe libikwa liqale ukutholisa lumuthi ezibhedlela zonke zikahulumende ngenyanga kaNkwenkwezi lonyaka.
UTapfumaneyi uveze ukuba lumuthi usukhona ezibhedlela zonke zikahulumende lemakilinika elizweni njalo utholakala kungekho mbadalo lanxa ethi ugatsha lwakhe luke lwahlangana lenkinga ezithize ekuqaleni ukuwusa ezibhedlela lemakikinika.
Ummeli wenhlanganiso ebona ngezempilakahle kumanyano wamazwe omhlaba wonke eye,World Health Organisation,u Dr David Okello,uthi igciwane elibangela isihudo se Rotavirus Diarrhea, livame kakhulu ebantwaneni abaleminyaka engaphansi kwemihlanu umhlaba wonke.
Uthi uOkello inengi labantwana abalahlakelwa yimiphefumulo ngenxa yalesi sihudo se Rotavirus Diarrhea bavame ukutholakala emazweni alobuyanga obedlulisa amalawulo.
Kungenxa yalesi sizatho lapho athi kuqakathekile ukuba kube ngezinye zenhlelo eziqakathekiswa kakhulu nguhulumende kanye lokufundisa uzulu indlela yokuziphatha kwezokhlanzeka.
Kuthi ummeli wenhlanganiso ye Maternal and Child Health Intergrated Programme ( MCHIP ) kuleli, u Dr Rose Kambarami,uveze ukuba ele Zimbabwe ngelinye lamazwe alenani eliphezulu labantwana abaleminyaka engaphansi kwemihlanu abalahlekelwa yimiphefumulo kubangelwa yimikhuhlane evikelekayo okunje ngesihudo se Rotavirus Diarrhea.
Osebenza njengomcebisi kwezokutholisa abantwana imithi ebavikela kumikhuhlane evame ukubahlasela ngesikhathi beseseleminyaka engaphansi kwemihlanu – Immunisation Technical Advisor, enhlanganisweni ye MCHIP, unkosazana Adelade Shearly uthi kuqakathekile ukusivikela lesi sihudo ngesikhathi besesebancinyane abantwana.
Ukhuthaza omama unkosazana Shearly ukuba phezu kokuba bavikelwe abantwana kumikhuhlane efana lesihudo se Rotavirus Diarrhea, kumele njalo baqakathekise imisebenzi yokuzihlanza.
Limithi ebalisa owe Rotavirus Vaccine utholiswa amazwe ancediswa yi WHO esencediswe yinhlanganiso ye Global Alliaence for Vaccine and Immunisation – GAVI, ukuze bawuthole lumuthi we Rotavirus Vaccine ukuvikela isihudo esibangelwa yiRotavirus ngenjongo yokwehlisa inani labantwana abalahlekelwa yimiphefumulo ngemva kokuhlaselwa yisihudo.
Abantwana batholiswa lumuthi wokuvikela lesi sihudo besesebancinyane besanda kuzalwa.Bawuphiwa kabili ngesikhathi belamaviki ayisithupha-6 weeks okuzalwa, lalapho sebelamaviki alitshumi-10 weeks.
Umkhosi wokuphawula ukusetshenziswa kwalumuthi emthethweni ungenwe zinkokheli zengatsha zikahulumende lwezempilakahle ezivele ezigabeni zonke zelizwe, inhlanganiso ezisebenzelana labezempilakahle kuleli okubalisa eye WHO,UNICEF kanye leye MCHIP.
Kulabo abekade belibazisa uzulu kulomkhosi babalisa abe choir ye Airforce of Zimbabwe, abantwana be Eastview Gardens Cheche kanye labaphathisa uzulu ngemfundiso yokuqakatheka kokuyathola usizo esibhedlela ikakhulu ukuvikelwa kwabantwana abaleminyaka engaphansi kwemihlanu abe Harare City Health Promoters.
