Inhlanganiso ezizimeleyo eziphakathi kohlelo lokuthuthukisa imisebenzi yabalimi eZimbabwe zithi abakuhlelo lolu baqhuba ngendlela ezakwenza ukuthi ilizwe liziphandele ukudla okuzahlala isikhathi eside kungakasetshenziswa.
Inhlanganiso lezi ezibalisa iWorld Vision, Care International, ORAP lezinye eziqhuba uhlelo lolu olusungulwe nyakenye luhlangothi lwe United States International AID for Development, zithi abalimi abanengi bayaluthakazelela okwamagama. Ziveze lokhu zisethula umbiko walonyaka wokunanza ilanga leWorld Food Day elinanzwe ngoLwesine kwamanye amazwe.
Zithi uhlelo lolu olukhangelelwe ukuthi luzaguqula indlela abalimi abedlula inkulungwane ezingamakhulu angamatshumi amathathu – 300,000 abaqhuba ngayo umsebenzi wabo, lulakho ukukhuphula isivuno samabele aseziphaleni zelizwe njalo uzulu abe lezifuyo ezinengi eziletha inzuzo emulini.
Ilanga leWorld Food Day lonyaka belilesihloko esikhangelane lokulima okwenziwa zimuli okungalolongwa ukwenzela ukuthi amazwe abelokudla okufaneleyo.
UNkosazana Shamiso Matambanadzo isikhulumeli senhlanganiso yeWorld Vision utshele iStudio 7 ukuthi benza kahle abalimi abakuhlelo lolu olwafakelwa imali yi U-S-A-I-D lolunye olifanayo olubizwa ngokuthi AMALIMA olusezabelweni zeMatabeleland.
Ingcwethi kwezentuthuko kazulu njalo lezokulima, uMnu. Everson Ndlovu, utshele uGibbs Dube weStudio 7 ukuthi kumele abalimi bakhuthazwe ukuthi benze inhlelo ezilohlonzi ukwenzela ukuthi eleZimbabwe libe lokudla okweneleyo okungafakwa leziphaleni zelizwe.
