amalinks wokungena

Breaking News

Kuvulwa Ikilinika Yohlobo lwePorta Cabin eTsungubvi Clinic eGlandale


PEPFAR
PEPFAR

Inkokheli yeZanu PF ekuhulumende ibingekho emkhosini wokunikeza okusemthethweni izakhiwo zama Porta Cabins ekilinika yeTsungubvi Clinic endaweni yeGlandale ngokuphathiswa ngabohlangothi lwesikhwama se United States President's Emergency Plan for AIDS Relief (PEPFAR), besesaba ukuthi kuzathiwa basebenzelana lezitha njengalokho okwenzakale kwabanye ngesikhathi esedlule.

Ummeli weMelika eZimbabwe umnumzana Bruce Wharton uthi akalani lenkokheli ezingazanga kulomkhosi, ethi yena uqakathekisa ukusebenzelana phakathi kukahulumende wakhe laleli lizwe.

Wengeza uWharton, ethi uhulumende wakhe uzaqhubeka ephathisa sikhathi sonke uhulumende weZimbabwe ethi wazadinga usizo kibo njengalokho asekwenzile, kwakhiwa izakhiwo zama Porta Cabin clinic la.

Utshele uzulu obekulomkhosi ukuba lesi sakhiwo esinikezwe okusemthethweni ku kilinika yeTsungubvi ngoLwesihlanu, ngesinye sezakhiwo ezilitshumi lanhlanu – 15 esezakhiwe endaweni ezehlukeneyo ezigabeni zontathu ze Mashonaland, ngenjongo yokuphathisa abaphila legciwane, behlala katshana lezibhedlela, ukuthi banelise ukufinyelela ezibhedlela bayethola usizo okumele balutholiswe okufana lokuyathatha amaphilisi.

Umqondisi we Center for Disease control kuleli umnumzana Peter Kilmarx uthi lokhu kwenziwe ngemva kokunanzelela ukuba lukhona udubo ukusilela kwendawo emakilinika lezibhedlela, zokuqhuba inhlelo zokutholisa usizo kulabo abaphila legciwane.

Inhlelo zabaphila legciwane bezivame ukwenzelwa phansi kwezihlahla loba ematendeni ngenxa yaloludubo yikho ohulumende bamazwe womabili bekubone kufanele ukuphathisa ngokwakha lama kilinika alamakamelo amathathu kutsho uKilmarx.

Esethula umbiko kaDr David Parirenyatwa obekumele abe ngomhlonitshwa kulomkhosi, uDr Nyamayaro laye utshengise ukulujabulela usizo olutholwe yilizwe phansi kwesikhwama sikahulumende wakwele Melika se PEPFAR.

Kuthi osebenza ekuhlangothi olubona ngezokukhulumisana lozulu emahofisini wommeli we Melika, umnumzana Sizane Weza uveze ukuba azakuba lusizo olukhulu lamakilinika ngoba uzulu usezakwanelisa ukuthola usizo kundaba eziphathelene legciwane kanye lengculaza.

Abaphila legciwane kulesi siqinti se Glendale batshengise ukusijabulela lesisakhiwo okuzakuba yiyona kilinika ephathisa abaphila legciwane, abafuna ukwazi phezu kwesimo sabo kanye lokukhulumisana labo ukuba bengajulelwa yimicabango i- councelling.

Umnumzana Joseph Mwale oleminyaka engamatshumi amabili lasitshiyagalombili - 28, ophila legciwane, ngomunye wabagcinisihlalo ku support group ye ZNNP+ etholakala khona eGlandale. UMwale ngubaba olengane eyodwa njalo unkosikazi wakhe okwamanje ukwele South Africa. Yenake ukhuthaza obaba njengaye ukuba baqakathekise ukwazi isimo sabo hatshi ukwesabela khatshana.

Unkosikazi Lydia Kasawaya ongunobhala jikelele we Support Group ye Wadzanai B uveze ukuba utholakale elegciwane ngomnyaka ka 2004 lanxa eke watshelwa ngaphambilini ukuba beselikhona ngesikhathi ezithwala ngomnyaka ka 1999.

Uyalujabulela loluhlelo eqonqosela abaphila legciwane njengaye ukuba bangaze bayengeka bawayekele amaphilisi nxa bethe baqalisa ukuwanatha, ngoba kumele benze njalo okwempilo yabo yonke.

Ukhulele koBulawayo uKasawaya lanxa abakibo sebe bayakwakhela esigabeni seGokwe, ulengane eyodwa eleminyaka elitshumi lanhlanu ephila legciwane layo njalo umkakhe sewabhubha ngoba engazange akwamukela ukuba ulalo igciwane.

Loluhlelo oluqhutshwa ngokusebenzelana phakathi kukahulumende wakuleli loweMelika ngaphansi kwesikhwama se PEPFAR lukhangelelwe ukuba lwanelise ukwakha ikhulu lamatshumi amahlanu – 150, lamakilinika ilizwe lonke, ikakhulu endaweni lapho obekungela izigaba ezingasetshenziswa ukuqhuba inhlelo zabaphila legciwane.

Lumsebenzi ubikwa uzaba lendleko yezigidi phose eziyisikhombisa zamadollar– US$6,9 million lapho usuqhitshiwe ngomnyaka ka 2015.

Umkhosi walamhlanje weGlendale ungenwe yiziphathamandla ezisebenzela uhulumende kanye lezehofisi yommeli weMelika lanxa ingazanga inkokheli yeZanu PF yakulesi sigaba Kanye lompathintambo wogatsha lwezempilakahle.

please wait

No media source currently available

0:00 0:05:26 0:00
Lapho esitholakala khona

XS
SM
MD
LG