amalinks wokungena

Breaking News

I-MISA – Zimbabwe Ivula i-Information Kiosk eMzingwane


Umzingwane Information Centre
Umzingwane Information Centre

Enye yenhlanganiso yokuhanjiswa kwembiko ivule indawo yokubala amaphephandaba endaweni yeUmzingwane ngoLwesibili ngenjongo yokuthi uzulu wemaphandleni laye afinyelele imbiko azi ukuthi kwenzakalani elizweni.

I-Media Institute of Southern Africa – Zimbabwe ivule i-Information Kiosk, ingeyakuqala ukuvulwa emaphandleni lapho uzulu angavamanga ukuthola amaphephandaba kuthi lalapho efika sokudlule isikhathi lendaba zakhona zingasekho egudwini.

Inhlanganiso le ithi esikhathini esinengi amaphephandaba atholakala emadolobheni kuphela lasezindaweni ezisemigwaqeni emikhulu egijima phakathi kwamadolobho la.

Ngaphansi kwesisekelo sombuso, ukuthola ulwazi kanye lembiko kulilungelo lawo wonke umuntu ngaphansi kwesahluko 62 esithi sonke isizalwane kumele sifinyelele imbiko ngendlela zonke ezikhona ezigoqela ingwalo, amaphephandaba lemisakazo.

Ummeli weUmzingwane edale lephalamende, uMnumzana William Dhewa, owebandla leZanu PF, uthi ulwazi luqakathekile ngoba luyavula amathuba amanengi kulabo abaludingayo abalakho ukulusebenzisa ukuthuthuka kwezemfundo, kwezokulima kanye lakwezenotho yelizwe.

Indawo le, uthi izathuthukiswa ngamandla kufakwe amathelevizhini, amakhomputha njalo abantu benelise ukuya ebulenjini kungela mbadalo.

Umqondisi weMisa-Zimbabwe, uMnumzana Nhlanhla Ngwenya, uthi basebenzelana labammeli bephalamende, okhansila kanye lezakhamizi ukuvula ama kiosk la athola amaphephandaba onke aselizweni lapho edindwa nsukuzonke kumbe maviki wonke, ngesikhathi.

Bakhangelele ukuthi ngendlela le yokusebenza bakhuthaze uzulu ukuthi aphatheke ekuhanjisweni kwembiko aze athole lemisakazo kazulu.

Umnumzana Dhewa ongumgcinisihlalo njalo wekhomithi yephalamende ekhangela ukusakaza lokuhanjiswa kwembiko, uthi basebenza leMisa Zimbabwe ukukhangelisisa imithetho edinga ukuguqulwa ihambelane lesisekelo esitsha sombuso. Uthi uzaqhubeka elandelela linhlanganiso ezinye izigaba zemaphandleni lazo zize zithole indawo efanayo yokuthola amaphephandaba.

IKiosk le ingeyesithupha ukwethulwa elizweni kodwa amanye amahlanu asemadolobheni abalisa iGweru, Masvingo, Mutare, Gwanda leKariba.

Uhlelo lolu lokusungula indawo lezi luqale nyakenye. Kunyanga ezizayo kukhangelelwe ukusungula eyinye emaphandleni eNyanga esigabeni seManicaland.

XS
SM
MD
LG