Bekugijinyiswana izolo lalamhla ezitaladeni zalelidolobho amapholisa kamanisipala esithi abathengisa okungekho emthethweni kabasuke, bebathathela lempahla yabo.
Lokhu kwenzakala ngemva kokuthi ikhansili ithembise ukuthi ayizukubasusa ize ithole indawo ezintsha zokuthengisela.
Ikhansili ibisithi iphakathi kokuguqula imithetho yayo ukuze kuvunyelwe ukuthengisa impahla lasezinkini yedolobho.
Umeya wedolobho uKhansila Martin Moyo, uthi bayazama ukunakekela indingeko zabathengisayo kodwa udubo yikuthi abalemvumo yokuthengisa bayakhonona ngalabo abathengisa yonke indawo bengelamalayisensi besithi babathathela ibhizimisi.
Lona idolobho, uthi lingaba yini nxa uzulu engendlala impahla yakhe yiloba ngaphi athengise kunga khathalekile ukuthi kusendleleni yezimota labantu.
Abantu abathengisela ezinqoleni kanye lemakhadibhokisini, uthi bahamba yonke indawo bethengisa bephazamisa labo abalamalayisensi.
Othengisayo, uNkosikazi Rita Ncube, uthi ikhansili ayibaphathi kuhle ngoba inhlanganiso yabo kade ibhalela ikhansili icela indawo ezintsha zokuthengisela kodwa bengatholi mpendulo ezwakalayo.
Uthi abantu abangelamvumo yokuthengisa labo bayabakhathaza ngoba liqiniso ukuthi babathathela abathengi ngoba abafani labo abatshona behlezi endaweni eyodwa bemelele ukuthi abantu babuye.
Omunye njalo othengisayo, uNkosikazi Sipho Sibanda, uthi akula enye indlela yokuziphilisa kungakho angaze abotshwe uzabuyela njalo kusasa ngoba akula omunye umuthi angawubamba.
Lanxa kuqakathekile ukuthi idolobho libe lihle, uthi lokhu akutsho ukuthi abantu bavinjelwe ukuthengisa edolobheni ngoba imisebenzi eyayikhona kubekwa limithetho ayisekho.
Wengeze esithi abezombusazwe lekhansili bajwayele ukuthi badinge ukufihla abathengisayo endaweni ezikhatshana lapho kulemicimbi cimbi etshiyeneyo edolobheni kuthi ke lapho sebefuna ukuvotelwa ngesikhathi sokhetho kube yikho lapho abathi amapholisa angababophi.
Ikhansili kanye labahlela ukuma kwedolobho baqhubeka bekhuthazwa ukuthi batshiye ukudinga ubuhle bedolobho kuphela bevalela phandle labo abadinga ukuthengisa baziselele kungathiwa bayagcolisa njalo benza izethekeli zingathakazeleli indawo . Kuyadingeka ukuthi kukhangelisiswe ukuthi abathengisayo banganikwa njani indawo kodwa bengaphazamisi osomabhizimisi abalezitolo nxa bethe bangena ezinkini yedolobho