Uhlelo lokubalwa kwabantu lusungulwa ngoLwesihlanu uhulumende ekhuthaza uzulu ukuthi aphendule yonke imibuzo azayibuzwa ngabaqhuba loluhlelo ngobuqotho ukwenzela ukuthi kutholakale inani labantu eliqondileyo.
Amalungiselelo aloluhlelo ake aphazanyiswa kumaviki edluleyo yikungenela kwabebutho lamapholisa.
Abaqhuba loluhlelo bazabonakala ngempawu ezithile ezigoqela amayembe alombala olithanga (orange) kanye lezithupha eziveza ukuba ngempela baqhuba uhlelo lwe-Census.
Abazaqhuba uhlelo lokubalwa kwabantux
Abazaqhuba uhlelo lokubalwa kwabantu
Esungula loluhlelo ngoLwesithathu, uMongameli Robert Mugabe ukhuthaze abantu ukuthi babe lemuli ezilabantwana abanengi ukuze isizwe sikhule.
"Sifuna abantwana abanengi. BoMama, lisiphe abantwana abanengi. Yindaba lisala ukuzithwala? Lanikelwani pho inzalo? Hayi bo, lingancitshani," kutsho uMugabe.
Izakhamizi ezigabeni ezitshiyeneyo zelizwe zithi zilumelele loluhlelo.
EGwanda sixhume uMnu Jaston Mazhale lesakhamuzi sakoBulawayo, uNkosikazi Mellisa Dube bona abathi inkuthazo kaMugabe ayisebenzi ngoba kunzima ukunakekela imuli ezinkulu kulezinsuku.
Ingxoxo LoMnu Jaston Mazhale loNkosikazi Mellisa Dube
Ukubalwa kwabantu kwenziwa ngemva kweminyaka elitshumi, njalo uhlelo lwakuqala lwenziwa ngo 1982 kwatholakala ukuthi ilizwe lalilabantu abayizigidi eziyisikhombisa lengxenye - 7,6 million.
Ngo1992 inani leli latholakala seliqonge lafika kuzigidi ezilitshumi lane - 10,4 million, kwathi ngo2002 laselikhule kancane laya ku 11,6 million.