Usetshiyile yini umsebenzi umqeqetshi weHiglanders uMnu Kelvin Kaindu?
Abasiki bebunda bathi YEBO kunjalo, kodwa iqembu leli lithi HATSHI akunjalo.
Abazi ngokwenzakalayo kuBosso batshele iStudio 7 ukuthi uKaindu utshiye umsebenzi ngoMvulo ngemva komhlangano awenze leziphathamandla zeqembu.
Lokhu kulandele ukunqotshwa kweBosso yiZPC ngempelaviki kumdlalo wePremier Soccer League.
Ngeviki edluleyo leliqembu linqotshwe njalo yiHarare City. Abasekeli abanengi bathi uKaindu kumele axotshwe.
Abantu esikhulume labo bakufakazile ukuthi imbiko ephume kuphephandaba leChronicle ngokutshiya umsebenzi kukaKaindu iliqiniso.
Kodwa uKaindu ukulandule lokhu ekhuluma leStudio 7. Umqondisi weqembu uMnu Ndumiso Gumede laye ugcizelele amazwi kaKaindu.
Kulabo abakhankasela ukutshiya isikhundla kukaKaindu bathi bayajabula alubana iliqiniso imbiko yokutshiya kwakhe umsebenzi.
Ingcwethi kwezemidlalo njalo engumsekeli weHighlanders uMnu Ezra Tshisa Sibanda utshele iStudio 7 ukuthi uKaindu wayemele atshiye umsebenzi kudala ngoba esehluleka.
Kolunye udaba, ugatsha lweZimbabwe Football Association luthi solulobele iConfederation of African Football lucela ukuthi imidlalo yeAfrica Cup of Nations idlalelwe eZimbabwe ngo2017.