Umkhokheli webandla leMDC-T usuke ngesiphangiphangi ko Bulawayo ngemva kokuthola imbiko ethi isigodlo sebandla lakhe eseHarvest House eHarare sihlaselwe ngamapholisa kwatshwaywa izisebenzi zebandla ezigoqela isikhulumeli sakhe, uMnu. Luke Tamborinyoka.
Uthe uTsvangirai esanda suka koBulawayo imihlangano akade eyihlelile isizaqhubekela phambili ikhokhelwa ngumsekeli wakhe, uNkosazana Thokozani Khuphe.
Kuthe bese Njube kwasekusiza ontanga bebandla le Zanu PF bahlasela abasekeli laba batshaywa kabuhlungu abangomama badatshulelwa izembatho batshiywa benqunu.
Kodwa amapholisa abikwa ebophe abasekeli bebandla leMDC-T. UChris Gande weStudio Seven uxoxe lomskeli wesikhulumeli sebandla leMDC-T ko Bulawayo, uMnu. Felix Magalela Mafa Sibanda ochasise ngokwenzakeleyo.
Kunjalo nje, iInhlanganiso ezilwela ilungelo loluntu eZimbabwe zithi zifuna ukuthi intathelizindaba elwela umbuso okhululekileyo, uMnu. Itai Dzamara akhululwe ngokushesha. Nxa engakhululwanga, lezi nhlanganiso zithi zizayakhalaza enhlanganisweni ezibalisa i- SADC leye AU ukuba uMongameli Robert Mugabe asuswe esikhundleni sokuba ngumgcinisihlal.
Lezi nhlanganiso zitshele intathelizindaba eHarare ngoLwesine ukuba zivumelene ukuthatha leli nyathelo ngemva kokungena umhlangano wesiphangiphangi wokubonisana phezu kokungenziwa ngesehlakalo sokuthunjwa kukaDzamara.
Esethula lumbiko emhlanganweni lentathelizindaba owenzelwe emahofisini eMedia Centre lamuhla emini, umqondisi wenhlanganiso ye Zimbabwe Democracy Institute ( ZDI ) u Dr Pedzisai Ruhanya uthi lokhu kwenza kukahulumende, ngezinye zezehlakalo ezidanisayo ma kukhangelwa umumo wezinto elizweni uhulumende esehluleka ukuthuthukisa umnotho welizwe lenhlala kahle kazulu.
U Ruhanya uthi bona njenge nhlanganiso ezilwela ilungelo loluntu bafuna bajeziswe kanzima abazatholakala belecala lokumthumba uItai Dzamara njalo bengasuthiswa yinkulumo kamsekeli kamongameli umnumzana Emmerson Munangagwa, ayethule edale lephalamende izolo.
UMunangagwa utshele idale lephalamende, ngesikhathi ephendula imibuzo phezu kodaba lukaDzamara, ukuba uhulumende ukhathazekile laye phezu kokunyamalala kwakhe okuyinto engakholwa yilezi nhlanganiso zisithi yikho abakutshelwa ngesikhathi kudingwa unkosazana Jestina Mukoko owathunjwayo laye ngendlela efanayo ngomnyaka ka2008.
Umqondisi we Zimbabwe Peace Project, uNkosazana Jestina Mukoko, utshele lumhlangano ukuba lesi sehlakalo siyamethusa ngoba simkhumbusa ahlangana lakho okwensuku ezingamatshumi amabili ( 21 days ) ngesikhathi ethunjiwe, amapholisa esenza esifanayo ukulandula ukuba yibo abamthetheyo.
Oze emele umanyano weCrisis Coalition in Zimbabwe umnumzana Mehluli Dube uveze ukuba umhlangano walamhla yikusungulwa kwemikhankaso yokuba uhulumende ehlukane lemikhuba yokuhlukuluza uzulu lapho ekhonona.
Elinye lamagqwetha aphatheke kudaba lokunyamalala kukaDzamara, esebenza lenhlanganiso yamagqwetha alwela ilungelo loluntu eye Zimbabwe Lawyers For Human Rights, umnumzana Lizwe Jamela uthi baluse edale le High Court loludaba ngenhloso yokuthi lethule isinqumo esibamba ngamandla abangabe belo Dzamara ukuthi bazise inkundla ukuba ungaphi.
Zithi lezinhlanganiso kuhlanu abakufuna uhulumende akwenze ngokushesha okubalisa ukukhululwa kukaDzamara lapho akhona, bajeziswe labo abazakutholakala ukuba yibo abamthumbileyo, alungisise isimo kwezomnotho esesisibi, okuyiyo imbangela yalokhu kukhonona hatshi ukuhlukumeza uzulu.
Zikhuthaza uhulumende labomthetho ukuthi bahloniphe isisekelo sombuso sikhathi sonke, sona esilondoloza ilungelo lomuntu wonke.
Kusenjalo amapholisa lamuhla avukele ukuyagombolozela isigodlo samahofisi ebandla le MDC-T, evimba abasebenza khona ukungena phakathi.
Lokhu kwenzakala ngemva kokuphuma kwemibiko ethi zitshaywe kakubi izisebenzi ezilitshumi lantathu ebe ziphakathi izolo kusihlwa, ngemva kwesehlakalo sokulwisana phakathi kwabontanga lamapholisa bevela kwethula isikhalazo sabo sokunyamalala kukaDzamara edale lephalamende.
UDzamara unyamalale ngoMvulo ekuseni ngemva kokuthunjwa ngamadoda amahlanu angaziwayo, ngesikhathi evela gelwa inwele bucwadlana lalapho ahalala khona emzini we Glenview Seven.
Lamadoda acatshangelwa ukuba ngabohlangothi lwamapholisa asebenza nsitha awe CIO.
Intathelizindaba yethu uMavis Gama usethulela loludaba.