IMDC-T Isungula Uhlelo Lokuqinisa Umnotho Welizwe
UMnu. Tsvangirai usole uhlelo lukahulumende olwe indigenization esithi aluthuthukisi inengi labantu elizweni.
Sithandekile Mhlanga
29.11.2012
WASHINGTON — Icele le MDC elikhokhelwa nguMnu. Morgan Tsvangirai lisungule uhlelo ngoLwesine eHarare lokuqinisa umnotho welizwe kanye lokubumba imisebenzi edlula isigidi esisodwa phakathi kweminyaka emihlanu elandelayo.
Uhlelo lolu lwaziwa ngokuthi yi JUICE amabala amele ukuthi Jobs, Upliftment, Investment, Capital, leEnvironment.
Ekhuluma kulumkhosi, uTsvangirai uthe eleZimbabwe lizakwenza kube lula ukuthi amanye amazwe aqhube amabhizimusi elizweni njalo liphe imvuzo amankampani azabumba imisebenzi lanxa umthwalo lo ungasoze ube lula.
UTsvangirai uphinde wasola uhlelo lukahulumende olweIndigenization esithi aluthuthukisi inengi labantu elizweni.
Ekhuluma emkhosini ofanayo, unobhala jikelele walelibandla, uMnu. Tendai Biti ugcizelele ukuthi , kuqakathekile ukuqinisa umnotho ezigabeni zonke zelizwe.
Isiphathamandla sogatsha lwabatsha kulelibandla uMnu. Promise Mkhwananzi utshele uSithandekile Mhlanga weStudio 7 ukuthi kuqakathekile ukuthi kubunjwe imisebenzi elizweni.
Ingxoxo LoMnu. Promise Mkhwananzi