Amacele womabili eMDC secele uMongameli Jacob Zuma weleSouth Africa ukuthi aphenduke eHarare azezama ukuxazulula ingxaki kuhlelo lokuloba isisekelo sombuso esitsha.
AbeMDC laba bethule lesi sicelo emhlanganweni abawenze lezithunywa zikaZuma ngoLwesithathu.
Iqula leli lihlangane labemela iMDC leZanu PF behlukene ngoLwesibili ekufikeni kwalo elizweni, lagqiba uhambo lwalo ngokuhlangana labo sebebonke ngelanga elilandelayo.
IMDC kaMnu Welshman Ncube itshele izithunywa zikaZuma ukuthi ifuna uMnu Arthur Mutambara evinjwe ukuphatheka kunkulumo zabakhokheli bamabandla akuhulumende womanyano.
Iqula leli belilamalunga amathathu abalisa uNkosazana Lindiwe Zulu, uMnu Mac Maharaj oyisikhulumeli sikaZuma kanye loMnu Charles Ngqakula.
Yena uZuma ngokwakhe ubikwa elakho ukuphenduka eZimbabwe kunsukwana ezimbalwa ezizayo ukuzokhulumisana labakhokheli bamabandla akuhulumende.
Ingcwethi kwezombusazwe njalo engumqondisi wenhlanganiso ezimeleyo, iMatabeleland Constitutional Reform Agenda, uMnu Effie Dlela Ncube uthi usekela inyathelo leMDC lokucela uZuma ukuthi aphenduke.