amalinks wokungena

Breaking News

Mliswa: Unkosikazi Joice Mujuru Kumele Akhulume Evikela Abaxotshwayo kuZanu PF


Obengummeli weHurungwe West edale lephalamende engakaxotshwa libandla lakhe leZanu PF, umnumzana Themba Mliswa, uhlasele obengumsekeli kamongameli welizwe laye oxotshwe ebandleni linye, umlandu wokuthulisa engameli abanye bakhe axotshwa labo. Kodwa omunye wabaxotshwayo obeyisikhulumeli salo, umnumzana Rugare Gumbo uthi kuyinkulumo nje yomuntu odinga usekelo.

UMliswa utsho lamazwi emhlanganweni lentathelizinda owenzelwe eMedia Centre ngoLwesine ekuseni esethula isimo sodlakela eHurungwe West lapho ancintisa khona ezimele kukhetho lwama by-elections oluqhutshwa mhla zilitshumi ngoNhalangula – 10 June.

IStudio Seven ikhulumisanae lomunye wabaxotshwayo besetheswa umlandu wokufuna ukuvukela umongameli Robert Mugabe, umnumzana Rugare Gumbo phezu kwenkulumo kaMliswa ngodaba lokuthulisa kuka Nkosikazi Mujuru.

U Gumbo uthi kulilungelo lakhe uNkosikazi Mujuru ukukhuluma loba ukuzithulela phezu kokwenzakala kuye kudaba lwezombusazwe kanye lokuxotshwa kwakhe ebandleni.

Emhlanganweni lo uMliswa uphinde wasola umkhuba wodlakela athi ugxile kakhulu kulelibandla, esezibonela ngawakhe lapho abalandeli bakhe behlukuluzwa kuthiwa bengaze mamvotela kulolukhetho.

Uncome njalo abenhlanganiso ezisebenzelana lozulu ethi yikhona kusithi dlwe kuye ukuba baqakatheke okunganani endabeni zokuba ngomlamlankunzi ekuxabaneni kwabantu, ngakhoke kumele basekelwe ngokugcweleyo.

UMliswa uthi akayikubuyela muva kudaba lokuncintisa kulolukhetho aleqiniso lokuba uzanqoba njalo uzakusa udaba lokuhlukuluzwa kwabacatshangelwa ukuba bangabalandeli bakhe, abanye babo bengabalinyazwe okubuhlungu.

XS
SM
MD
LG