Umnu.John Nkomo Uphiwa Inhlonipho Yeqhawe Lesizwe
Isidumbu sizasiwa eTsholotsho leWhite City Stadium ngoMgqibelo, sibuyiselwe eHarare lapho esizabekwa khona ngoMvulo eNational Heroes Acre
Vice President John Landa Nkomox
Vice President John Landa Nkomo
Ntungamili Nkomo, Sithandekile Mhlanga
18.01.2013
WASHINGTON — Idale lePolitburo lebandla leZanu PF, lihlangene ngoLwesihlanu lavumelana ukuthi umuyi uMnu. John Nkomo aphiwe inhonipho yeqhawe lesizwe.
UNkomo, obengumunye wabasekeli bakamongameli welizwe, ubhubhele eHarare ngolweSine ngemva kokugula okwesikhathi eside ebulawa ngumkhuhlane wemvukuzane. Uzabekwa emalibeni eNational Heroes’ Acre eHarare ngoMvulo.
UMnu. Rugare Gumbo isikhulumeli sebandla le ZANU PF utshele uNtungamili Nkomo weStudio 7 ukuthi isidumbu sika Mnu. Nkomo sizasiwa eTsholotsho ngoMgqibelo ngendlela yokuvalelisa unina kamuyi lemuli yakhe, kanye leWhite City Stadium lapho esingabonwa ngabanengi. Sizabuyiselwa eHarare, lapho esizabekwa khona ngoMvulo.
Ingxoxo LoMnu. Rugare Gumbo
Ukuhlaziya loludaba, uSithandekile Mhlanga weStudio 7 uxoxe loMnu. Max Mnkandla, umgcinisihlalo we nhlanganiso yabalwa impi yenkululeko-eye Zimbabwe Liberators' Peace Initiative, owake wasebenza lomuyi kubandla le ZAPU, lakugatsha lwayo lwevuyo lebutho leZIPRA. UMnkandla uthi uNkomo liqhawe lesizwe elingabuzwayo, ngenxa yemisebenzi ayiqhubayo esaphila elizweni. Wengeze wathi kungenzakala ukuthi ibandla leZANU PF likhethe umgcinisihlalo walo uMnu. Simon Khaya Moyo ukuthi athathe isikhundla sikamuyi, lanxa kusobala ukuthi uRetired Brigadier General Ambrose Mutinhiri nguye owayelesikhundla esiphezulu kulabo bonke ababengamalunga eZIPRA abasaphilayo.
Ingxoxo LoMnu. Max Mnkandla
Kusenjalo, amazwi okududuza imuli yakoNkomo lesizwe seZimbabwe lokhu esiza evela kumagumbi amane elizweni kanye laphandle. Amazwi endunduzo athunyelwe ngababalisa umkhokheli webandla leMavambo/Kusile uMnu. Simba Makoni, umongameli Jacob Zuma weSouth Africa, abakhokheli bamacele eMDC womabili uMnu. Morgan Tsvangirai, kanye loMnu. Welshman Ncube, umkhokheli weZAPU eseyavuselelwa uMnu. Dumiso Dabengwa, ummeli weMelika eZimbabwe uMnu. Bruce Wharton labanye.