Abaphila ngokuthwala abantu kanye lemphahla phakathi kweZimbabwe leBotswana, abaziwa kakhulu ngokuthi ngoMalayitsha, sebezahlawuliswa imali eziphezulu uma betholakale bethwele okwedlulisa amalawulo.
Umphathintambo weBotswana obona ngezokuhambisa umnunzana Tshenolo Mabeo utshele idale lephalamende ukuthi bayakhathazeka ngabathwala imphahla ngemota ezincane bedlulise amalawulo.
UMabeo uthi kulezimota, okuvame ezenjiva ezisebenzisa kakhulu umngcele wePlumtree zibalekela ukuminyana eBeitbridge. Uthi ukuthwala kwabo, oze ufice imota isihuba phansi, kufaka impilo zabantu engozini ngoba kuvimba ukubona kahle kwabanye abatshayeli.
Ukuqinisa izibopho iBotswana esizithethe, uMabeo uthi omalayitsha kuzamele balinganise isisindo semota zabo kumabholoho ayenza lokhu, ama weigh bridge.
Uthi abazatholakala bengaphezu kwesisindo esivunyelwayo, bazagwetsha, okugoqela lokuthi amapholisa abakhaphe besiyaphuma elizweni.
Lo ngomunye umthwalo onzima kulabo abakubhizimusi yokulayitsha. UOzias Ndiweni uthi okwabo sokungokwezandla. Uthi ukwehlisa inani lemphahla abazithwalayo kutsho ukwehla kwenzuzo.
Uqhubeke esithi ngesikhathi esifitshane babone inhlanganiso kahulumende ebutha imali eyeZIMRA ikhweza imthelo emgceleni, okwehlisa inzuzo yabo.
Kukanti oMbulelo Maduna yena uthi ngitsho lendleleni bathwaliswe nzima ngamapholisa eZimbabwe, amanye efuna ukufumbathiswa phezu kwengxaki abazibona emngceleni.
Lesi ngesinye isipikili esinzima kubhokisi labo layitsha ababhekane lebhizimusi elehlayo ngenxa yokutholakala kwemphahla enengi eZimbabwe, kungakho abangaphandle kwelizwe abasabasebenzisi kangako ukuthumela imphahla.
IBotswana yona ithi iyakhathazeka ngendlela imphahla ehamba ilenga ngayo kubomalayitsha, noma nje yakhipha umthetho ovimbela lokhu ngo Mbimbitho ka2014.
AbeZimbabwe bayaziwa kakhulu ngokuphakitsha noma yini ikakhulu uma bephindela ekhaya ngamakhefu.