Idale lephalamende ngoLwesibili linqume ukuthi izihlalo zakulelidale ezeHeadlands le Hurungwe West ezaziphethwe yiziphathamandla zebandla leZANU PF, uMnu. Themba Mliswa loMnu. Didymus Mutasa abaxotshwe kulelibandla ngenyanga edluleyo kazisamelwanga, okukhomba ukuthi sezingancintiswa kukhetho.
Esethula lumbiko edale lephalamende, uMnu. Jacob Mudenda, umlawuli walelidale uthe waziswe libandla leZANU PF ukuthi ababili laba abasengamalunga alelibandla.
Ngaphansi kwesisekelo sombuso selizwe, lokhu kutsho ukuthi uMnu. Mliswa loMnu. Mutasa abangeke beqhubeka bemela iHeadlands leHurungwe West kulelidale ngoba ibandla labo selibaxotshile.
Esinye isinqumo esethulwe nguMnu. Mudenda ngesokuthi intathelizindaba sezivunyelwa ukusebenzisa omakhalekhukhwini kulelidale.
Ukuze sizwe okunengi ngaloludaba, uSithandekile Mhlanga oweStudio 7 uxoxe loFoster Dongozi, unobhala jikelele wenhlanganiso elwela amalungelo entathelizindaba, eye Zimbabwe Union of Journalists, yena othi intathelizindaba zemukele ngokuthokoza lesi isinqumo.
.